Rio tazüngba kuli ken o Nov 11 nü angadangtsü thinen; Ni kodanga BA (Honours) kuli mamshi: Rio

Oct 21, 2016 nü Member of Parliament, Neiphiu Rio-i Kohima nung okadak kima osangbener den sensaksemdang agiba noksa angur.

Kohima, October 21 (TYO) : Honibarnü Kohima nung okadak kati taoba Nagaland Chief Minister aser tang teinyakdak Lok Sabha MP, Neiphiu Rio indang tazüngba ken o November 11, 2016 nü angadangtsü atema anogo thinen.
Iba ken o ya Rosemary Dzuvichu-i Neiphiu Rio anema benokba lir aser iba nung 2014 Lok Sabha elections mapang Rio-i affidavit nung tazüngba kuli tiyazü agütsü ta aija lir.
Iba ken o ya Rio-i mepishiba sülen CJMFC Mezivolu T. Therieh’er court nungi Judicial Magistrate First Class (CJMFC) Tucuno Vamuzo dangi belena liasü.
Ajisüaka, ken o benoker atema okatsürtemi iba ken o belenba atema High Court tsüngdang ken o ka benokogo anungji hopta ana agütsüsemang ta mepishiba ama lower court jagi November 11, 2016 nungang ken o angadangtsü atema thinen.
Tanü okadak nungi aluba sülen Rio-i osangbener den ajurutepa sensaksemdang pai aibelena mali ta ashi.
Kohima College Kohima ketdangsertemi certificate tai agütsüba atema public dang tatok meshiogo aser parnokisa aibelena inyakba atema-a kuli agütsüogo, ta paisa ashi.
Kohima College-i December 12, 2012 nü certificate ji agütsü, saka 2013 küm pa State General Election nung toktepdang, pa indang affidavit nung BA (Honours) in Political Science ta masü saka BA ta shitakba zülu, ta Rio-isa shisem.
Kechiba college ketdangsertemi certificate agütsüli idakji aibelena aliba memetongshi ta osangbenertemi asüngdangdang, “Ni State nung Chief Minister ka ama inyakdang kanga mazüngi liasü aser parnoki kü nem BA (Honours) certificate agütsübaji ni khenyongi memetet liasü” ta pai langzü.
“2014 Lok Sabha election nung affidavit agütsüdang kü indang tazüngba kuli aibelena agütsü. Ibaji ni asoshi mapa inyakertemi kü indang documents nung aliba amaji zülur agütsüba liasü. Ni kodanga ni BA (Honours) ta shia mali, saka ni Kohima College Kohima nungi BA ta dang zülua lir. in State Assembly (Who is Who) aser Lok Sabha nunga, ni yamaji dang amshia lir. Ni aibelena mali ta sayutsü kuli agütsütsü atema tanü ni yangi arua lir” ta Neiphiu Rio-isa metetdaktsü.
Osangbener kari pa dang iba onük ya tang teinyakdak Chief Minister, T.R Zeliang tena tsüngda ‘political war’ asü ta asüngdangdang, “Ni nisung shinga dena political war mali saka kari kü den lira, ibajibo ni memetet” ta Rio-i langzü.
February 11 nungi iba ken o okadak benoka angadangyonga arur aser tanü Rio-i mezüng okadaki aru. Iba mapang pa pusema nungiter aikati pa meina aru aser pa pusemer kari “Truth will prevail” o “Rio is the answer” ta tezülubatem amer okadak kima noktak.