Rio & Therie nati asür T. Kire’er kibong den asüku lemsateper

Dimapur, November 4 (TYO) : New Delhi nung Thekruneituo Kire ajungbena asüba osang angashia aoksar aser temulung züreper, ta Nagaland MP Neiphiu Rio-i sangdong ka nung metetdaktsü.
Asür T. Kire ya Department of Industries and Commerce nung retired Director liasü aser pa junga alidang sorkar mapa tenzükba nung kanga meranga inyakogo. Pai department kanga junga len ani aser mapa tajung aika inyaktsüogo. Pa sorkar mapa nungi anisüngzüba sülena lokti nung nübortem asoshi mapa inyakogo, ta Rio-sa sangdong nung shia lir.
Pai iba akümli toktsür aobaji Angami nunger atema dang masü saka Naga nunger atema takoksa lir. Pa asübaji ni aser ozü kibong atema takoksa ulura kechiyong pa ozü kibong asoshi medemer tajung ka liasü. Ni aser ozü kibong tasü kibong den asüku lemsateper aser tasür tanela teti anisüngzükdak alitsü sarasademtsür, ta Rio-isa metetdaktsü.
NPCC tir K. Therie-ia sangdong ka nung Tobu Kire asüba opsang angashia aoksa bilemba osang metetdaktsü.
“Ni aser NPCC tenüng nung tasür kibong den asüku lemsateper aser Tulusang Tsüngremi tasür kibong nem tesünep aser anisüngzük agüjang ta sarasademtsür,” ta K Therie-isa sangdong nung shia lir.