Rio Village Sports Meet nung tongti tesemdanger alitsü

Dimapur, October 07 (TYO): Chumukedima Area Village Council Association (CAVCA) den külemi lungjemer Extra Assistant Commissioner (EAC), Chumukedima, Thungbemo Patton-i ‘Play for Unity’ omen nung ajemdaker Village Sports Meet tan October 17 nü nungi tenzüka asayatsü ayongogo.
Sovima Cricket Ground nung agitsü renemba asayamong tenzükba sentong nung Lok Sabha MP, Neiphiu Rio tongti tesemdanger aser Nagaland Parliamentary Secretary, Irrigation & Flood Control, Jacob Zhimomi tetushi tesemdanger alitsü.
“Chumukedima kübok densemba yimtsüng 55 ajunga lungjemdaktsüba den külemi, saisapongtsü sempet alir asayartemi tan asayamong nung shilem agiba ajanga pei sempet tajung alima dang sayutsü maongka tajung angutsü,” ta Thungbemo-i metetdaktsü.
Tetsür volleyball aser tebur football na densema asaya shilem 2 küma lemsar Diphupar A Village Ground, Chekiye Village Ground, Diphupar B Village Ground aser Chumukedima Ground nunger nung anogo 8 agia asayatsü ayongba asayamong nung telok 55-i shilem agitsü renema lir.
Football tetoktepba nung 1 buba, 2 buba aser 3 buba jenjang angur nem senpet sen 1,00,000, 50,000 aser 30,000 agütsütsü renemba den külemi, volleyball tetoktepba nung temaba jenjang 3 angur telok asem nem senpet sen 70,000, 40,000 aser 20,000 agütsütsü renema lir.
Sovima Cricket Ground nungsa tan October ita 24 nü agitsü ayongba asayamong shibangba sentong nung Governor, Nagaland & Assam, P B Acharya tongti tesemdanger aser Advisor, Urban Development, SI Jamir tetushi tesemdanger alitsü.

You must be logged in to post a comment Login