Riphyim Old III repoll kanga süngjema agiogo

Kohima, April 25 (TYO): Election Commission of India (ECI)-i shidi ka ajanga 37-Tyui Assembly Constituency kübok Polling Station no. 31, Riphyim Old III nung agiba election ji magir, ta shia April 25, 2019 nü election agishitsü atema tuyua liasü, iba nungji ajemdaker tanü election agishiogo, ta Media Cell, CEO Office Nagaland sangdong ajanga metetdaktsü.
CEO, Abhijit Sinha-i, tanep 7:00 ako nung polling tenzük aser election junga tiptema agitettsü atema DEO Wokha-i maparen ajak ketdangsüa liasü, ta metetdaktsü.
CEO-isa, CRPF section ka nem mapa lemzüktsü aser IRB platoon ana yimtsüng jagi yok, micro observers asem yok aser general observer-ia polling agiba maparen repranga liasü, ta metetdaktsü.
CEO-isa, anogo piyong webcasting asü aser ano camera ka inoksema election agiba maparen ajak tangoka liasü aser nikongdang 4:30 ako meta polling tembang, ta metetdaktsü.
Vote agütsütsüpur nisung 602 nungi 466-i vote agütsü aser vote agütsüba shilemji 77.4% liasü. Tebur 288 nungi parnok 227-i vote agütsü aser tetsür 240 nungi parnok 239-i vote agütsü.
CEO-i ashiba agi, polling tembangba sülen polling party ji Wokha-i meyipa aru aser EVMs ji strong room nung yuogo.
Tanü polling tiptema agitetba atema CEO, Abhijit Sinha-i election ketdangser ajak dang pelaba metetdaktsüba den külemi voters danga pelaba shisem.