Ripun Bora aser Bobbeeta Sharma nati Amit Shah aitsür

Guwahati, April 23 (Agencies): Bharatiya Janata Party (BJP) president Amit Shah-i Assam National Register of Citizens (NRC) indang onük jembiba atema Assam Pradesh Congress Committee (APCC) president Ripun Bora-i aitsü.
Yashi Amit Shah-i “onoki sorkar kümtettsü tashi ngura, linük ajungalen National Register of Citizens (NRC) mapa inyaktsü aser refugee ajak nem senso agütsütsü” ta ashi.
“Iba onük ya democracy aser temzüng anema lir, kechiyong NRC ya Supreme Court ketdangsüba kübok inyaker. SC-i NRC tatemsa sayatsü atema anogo latetja lir. Anungji NRC mesayadang CAB mapa tenzüktsü ta Amit Shah-i kodaser shiteter?” ta Ripun Bora-i asüngdang.
“Rajya Sabha nung mebenoktetba ajanga CAB ji February nung süiogo. Ajisüaka, BJP-i iba Bill agizüktsü atema pungmangba manener. Parnok indang pungmangtem kodanga asangsang nung mataloktsü” ta paisa ashi.
“Ozüng alema arurtemi shisabuluba dak alaka refugee temi shisa tebulu. Citizenship (Amendment) Bill, 2016 tama tenzüktsü aser refugee ajak nem senso agütsüba sülen ang NRC yanglutsü” ta Amit Shah-i yashi West Bengal nung election nüboyimba sentong ka nung ashi.
Gauhati Lok Sabha menden atema Congress candidate Bobbeeta Sharma-ia tanü lar party-i sorkar kümra Citizenship (Amendment) Bill 2016 agientsü ta nenshia metetdaktsü.
“CAB ya Assam nungertemi magizüker ta metetsümonga Amit Shah-i mapang shia BJP-i iba bill agizüktsü indang jembia arur. Onoki iba Bill anema noktaka arur aser maneni noktaktsü. Bill mechi nung nübortemi Congress posemtsüla” ta tanü Bamunimaidam nung vote enoktsüba sülen Sharma-i ashi.
Guwahati kübok polling station kar nung Electronic Voting Machine (EVM) aser Voter-Verified Paper Audit Trail (VVPAT) timtem ajuruba atema “ni iba osang angazükogo aser ozü ketdangsertem dang osang tejangja metetpelatsü shiogo. Onoki sorkar dang polling timi agitsü atema inyakang ta ayongzüker” ta laisa metetdaktsü.
Tanü Guwahati, Kokrajhar, Barpeta aser Dhubri constituency tem kübok polling centres 9,577 nung polling süogo.