Rishi Kapoor-i BJP peladaktsüner: Congress

New Delhi, May 18, 2016: Actor Rishi Kapoor-i, kechiba linük nung tongtibang tesem aser osettem ajak nem Gandhi’er tenüng jaloktsür, ta ashiba sülen Congress-i, “Tang yimsü tesüdak BJP telok nem züngshidaktsünüba agi nüburtemi Gandhi anemer,” ta ashi.

Congress otongdar P.C. Chacko-i film actor sang (Rishi Kapoor) tenüngbo metetshi, ajisüaka pai, nisung kari tashi aketertem nem parnok züngshidaktsütsü meranger, ta osangbenertem dang ashi.

Chacko-i, “Ni Rishi Kapoor-i twitter nung züluba mangu, ajisüaka nisung kari congress tenüng menükja Bharatiya Janata Party (BJP) nem züngshidaktsüner,” ta ashi.

“Panoki tashi aketer teloki aginüba inyaktsü meranger. Panoki tenüng tajung aginüra tanga party ka tenüng mamshitsüla. Onoki iba ama inyakyim ya retreta magir aser iba tatalokba nung kecha mashir,” ta pai ashi.

Rishi Kapoor-i twitter nung tesüiba mapang Congress sorkari linük nung tongtibang tesem aser osettem nem Gandhi’er tenüng jakloktsüba aija zülu.

Pai, “Tang yimsü tesüdak sorkari lokti atema inyaker tongtibang nisungtem tenüng agi item tesemtem tenüng melen nung ajungtsü,” ta ashi.

Pai, “Kechiba Delhi tayimtsü anenba tesem nem Mahatma Gandhi, Bhagat Singh mesüra Ambedkar nunger tenüng mejaloktsüi Indira Gandhi International Airport ta ajar,” ta asüngdang zülu.

Alima nung sen dalangtiba smartphone ‘Namotel Acche Din’ sen 99 agi sayaogo

Bengaluru, May 18 (Agencies):  Bengaluru nung amenoka aliba Namotel company-i ‘Namotel Acche Din’ smartphone sen 99 agi sayaogo aser iba ya alima nung sen dalangtiba smartphone asütsü, ta parnoki ashi.

Osangbenertem den senden ka akaba mapang Promoter Madhava Reddy-i, iba smartphone ya company website namotel.com ajanga May 17 nungi May 25 tashi nung jelia mangatsü akok, ta ashi, aji oda süaka Times of India (TOI) nung inyaker kati iba smartphone mangatsü atema iba website ji lapokdang dang melapoktet.

Iba den külemi iba smartphone manganertemi mezüng bemybanker.com website nung tenüng züluok nungdang iba smartphone mangadang nüngdakba user ID aser password angutsü. bemybanker.com website nung züngsem saru sen 199 khen agütsütsü nüngdaker aser iba sülen iba ama saru kecha malitsü ta ashir, ajisüaka, TOI nung inyaksangi bemybanker.com lapokdangdang ‘error’ sayu.

Ashiba agi, Namotel Acche Din smartphone screen ji 4-inch, 480×800 pixels WVGA resolution lir. Iba phone nung Android 5.1 Lollipop OS aser 1GB RAM inokja lir.

Smartphone nung 4GB memory keta lir aser ibaji microSD card amshia 32GB tashi ulua kümtettsü.

Phone tesülen 2MP camera inokja lir aser selfie tangoknertem atema VGA selfie camera dena inokja lir.

Phone nung 3G den sim card ana amshitettsü. Iba phone ya sen 2,999 nung sen 99-i atsüzüker ayokerba lir, ta parnok website nung shia lir aser jelia phone mangartem dang nungi phone agi ki tongerang sen meshitsü. Phone ki tongtsüba atema taa sen tera agitsü, ta parnoki ashi.

Iba phone ya linük nüburtem meimba temaitsü aser ‘MAKE IN INDIA’ inyakyim den sentaktepa yangluba lir koba Aadhar alirtem dang ang ayoktsü.

Webite nung aguja aliba phone noksaji temaitsü atema amshiba dang lir, ta parnok website nung shia lir.