Rishi Kapoor-i pa pusemertem tenüng asanger

Mumbai, May 19, 2016: Bollywood film actor tejen, Rishi Kapoor-i twitter ajanga, Congress-i India nung tongtibang tesem aika nem Gandhi’er tenüng jaloktsüba aija züluba ajanga linük ajunga nung kanga süngmangtepa aliba mapang pai, pa pusemertem dang pelaba metetdaktsüogo.
Bodhbar aonung, Rishi-i, Congress-i tongtibang tesem aika nem Nehru-Gandhi’er tenüng agütsür aliba tenüngtem Bharatiya Janata Party (BJP)-i tanga tenüng agi melena aja nung ajungtsü, ta twitter ajanga lemsatepa liasü.
Iba dak sentakba nung Congress otongdar P.C. Chacko-i, BJP nem züngshidaktsütsü atema nisung kari Gandhi’er kibong ajemzüka yutsütsü meranger, ta actor sang tenüng metetshi osangbenertem dang ashi.
Ajisüaka Rishi-i twitter ajanga lemsatep o ya actor Anupam Kher den Indian Film & Television Directors’ Association (IFTDA) Tir, Ashoke Pandit nungeribo pu asemer.
Parnok dang pelaba sayua, Rishi-i, “Nenoki ni ashiba o nungita pusemba atema kanga pelar. ‘Mera Bharat Mahaan’,” ta twitter ajanga ashi.
Pai tweet ka nungbo Delhi nung aliba tayimtsü anenba tesem nem Indira Gandhi tenüng magütsüi Mahatma Gandhi, Bhagat Singh, Ambedkar mesüra kü tenüng amala agütsünung koda ? Nenokia koma bilemer ? ta shia lir.
Pai iba o lemsatepba sülen nüburtemi tebilemba balala aika ashiba ngua pa kanga süngmanger.
“Nenok ajak dang kanga pelar! Ni kü mulungjang ajak agi pelar,” ta paisa ashi.