Ritika Mehta tepsettsü merangba aitsür

Dimapur, November 16 (TYO) : November 13, 2015 nü Apna Hotel, Dimapur kibur Ritika Mehta tepsetba merangba inyakyim kukua aitsür ta Dimapur nung shishilembartemi sangdong ka nung metetdaktsü.
Hotel telungi atur kibur kahsettsü merangba inyakyim ajanga ozüng alema inyakertemi tashiyim mapa ayongayonga inyakba jungkai adoka sayur. Iba tatalokba ajanga ozüng amertemi shishilembartem aser civilian tem lendong nungi kümzüka ayutsü atema mapa tuluba inyaktsü ajungmesor, ta Dimapur Chamber of Commerce & Industry (DCCI) sangdong nung shia lir.
Iba mapa inyakba nisung tekaratiba nung jangjateta aputsü aser ozüng tapet agi merenshitsü takhangba agütsür, ta DCCI sangdong nungsa metetdaktsü.
Ano, Nagaland Hotel & Restaurant Association (NHRA)-ia sangdong ka nung parnok Secretary aser tetsür shishilembar Ritika Mehtha tepsettsü merangba aija metetdaktsüogo.
Benjung mapang aser talisa Hornbill festival atongba mapang tourist aser shishilembartem aika arutsü. NHRA-i Nagaland nung Tourism ajungkettsü meranger anungji local administration aser police kanga jeretpera alitsü aser traffic police-i ainertem dang yimya-awashi tajung sayutsü mepishir, ta NHRA-isa sangdong nung shia lir.