Riyad Mahrez ‘African Footballer of the Year’ shimogo

Abuja, January 6, 2017 (Agencies) : Riyad Mahrez shibai yaküm Leicester City-i Premier League akokba nung tongtibang shilem agi, pa Brihostibarnü African Footballer of the Year shimogo.
Leicester nungi tesangra asayar Algeria`s Mahrez shibai par telok takoki ani pai Borussia Dortmund nungi asayar Pierre-Emerick Aubameyang; 2015 takok angusang aser Liverpool nung asayar Sadio Mane ajateta iba tetushi sempet angu. Africa linük team nung coach tem, technical director tem aser media experts temi iba ya shimer.
Nigeria yimtiba nung annual Confederation of African Football (CAF) awards sentong nung takok osang sangdongdang, Aubameyang vote 313 aser Mane vote 186 anguba jakdang iba Leicester asayar yagi vote 361 ngua takok angu.
“Algeria nungi Mahrez asoshi kanga dang tajangzük akaba küm ka süogo. Leicester City-i alima ajak aoksaja Premier League akokba nung pa-a tongtibang asayar ka liasü, aser iba asaya nung pai goal 17 agütsü,” ta Africa nung football achayangba teloki shisem.
Küm 25 tain Mahrez ya France lima asortem nungi iba sempet agizüker rongnung Frederic Kanoute aser Aubameyang sülen tasembuba asayar lir. Lakhdar Belloumi 1981 küm aser Rabah Madjer 1987 küm iba sempet agizükba sülen Algeri nunger asayar rongnungi pa tasembuba lir.
Mahrez züngsema küm toku nung English Premier League club nung asayartemi tenetben iba sempet agizüker.
“Ni Leicester telok nungi külem asayatem, Algeria aser kü coach tem dang kanga pelar. Iba ya kü asoshi akhüm, nünsang ulura lir,” ta Mahrez-i sempet agizükdang ashi.
CAF awards nung Manchester City nungi asayar Kelechi Iheanacho Africa’s Most Promising Talent, aser Arsenal nungi asayar Alex Iwobi Youth Player of the Year shim.