Riyad Mahrez-i Leicester City toktsüner

May 31, 2017 (Agencies): Leicester City nungi Algeria nunger forward Riyad Mahrez-i 2016 Premier League champion toktsünür ta sangdongba osang, Mongolbarnü osang ka ajanga metetdaktsü.
Arishi küm 26 tain asayar ya 2014 küm French club Le Havre nungi Leicester City nung arua aden. Pai ashiba agi, yaküm club indang mendenbuba den sensaksemba sülen meneni club nung season ka asayatsü asoshi telemtetba agia liasü.
Ajisaka pai ashiba agi, pa kanga dang takok angutsü jangraba nisung ka lir aser pa club toktsütsüba osang agütsüogo.
Mahrez ya 2016 PFA player of the year lir aser pai Midlands club nung yagi iba season game 48 nung shilem agi aser goal 10 agütsü.
Pai yaküm Leicester den sen pound 400,000 yong küm pezü atema contract ka yanglua liasü.
“Leicester akhüm tsübuba aser meimba yong ni ochishia dang jembiner. Ni club dang ni joko club toktsütsü mapang tongogo ta metetdaktsüogo. Ni club indang mendenbuba den yaküm sensaksem tajung ka agiogo aser ni club nung küm kabo ano asayaa club tajungtiba nung tenzüktsü asoshi molungtepa liasü. Ni Leicester nung küm 4 jangratema asayaogo aser iba club nung shilem ka ama Premier League champion akümba aser onoki ajangtetbatem ajak atema nema danga bilemer. Club aser fan tem den tesendaktep ni taküm tepeyong bilemtettsü aser parnoki kü telemtetba angatettsü ta imlar,” ta Riyad Mahrez-i ashi.