RMSA candidate temi lungkak ait tenzükogo

Kohima, December 2 (TYO): Nagaland RMSA Written Exam 2014 qualified candidate forum-i Bodbar nungi Old Secretariat nung aliba RMSA Nagaland office kima lungkak aittsü tenzükogo aser parnoki Mission Director nem tezüluba nung takhangba ka agütsüogo.
Sorkari mapa 960 atema advertisement agütsü saka mapa 532 nung dang nisung shimok aser result metetdakjaka mapa 428 tazüng yua lir, ta Forum Convener, Kakika Z. Sumi-i osangbener dang ashi.
Parnoki Mission Director dang results meyipa reprangshimtsü aser written exam result adokba sülen agütsüba B. Ed Degree magizüktsüla aser ano mapa tazüng aliba ajak nung nübo peria shimoktsüla ta takhangba agütsüogo, ta Forum Convener-isa ashi.
Forum-isa Mission Director dang advertisement nung ‘physically handicapped candidates’ atema shilem 3 mekazüka yutsütsü ta sangdongba ama mapa küma inyaktsü shiogo.
Advertisement agütsüba nung backward tribes atema cut off mark ji 40% liasü saka results nungbo 45% den timba angur backward tribes candidate tem meshim. Iba asoshi Forum-i telangzüba meshiogo, ta Kakika-isa osangbener dang ashi.
Ano, Sumi, Ao, Lotha aser Tenyidie atema ‘language teachers’ telatetji graduate den ‘preference to diploma holder’ ta liasü saka diploma aliba candidate tem graduation nung 45% nungi tajemba angu ta shia meshim. Iba onük atema onoki telangzüba meshiogo. Ano, Forum-isa sports candidate tem atema viva-voce agitsü anogo metetnüa asüngdangogo, ta Kakika-isa ashi.
“Onoki mapang tatakzük melii lungkak aittsü tenzükogo aser onoki akhangba ama telangzüba mangu tashi aser kuli tejangja magütsü tashi lungkak aittsü” ta paisa shisem.