RMSA candidate temi lungkak aitba sentong anena atatsü lemtet ; Minister Yitachu-i appointment order agütsütsü tuyur

Kohima, April 12 (TYO) : School Education & SCERT Minister, Yitachu-i tezüluba nung tenangzükba ka agütsüba sülen Rashtriya Madhyamik Shiksha Abhiyan (RMSA) Phase 2 & 3 candidate temi Mongulbarnü lungkak aitba sentong anena atatsü telemtetba agiogo.
Tanü RMSA selected candidate temi Minister Yitachu den ajurutep aser idangji pai tezüluba nung tenangzükbaji agütsü.
RMSA kübok Headmaster mapa tazüng aliba melena waiting list nung aliba Graduate Teachers 111 nem tan ita tsüngda appointment order agütsütsü atema Minister-i Nagaland state RMSA Mission Director nem tezüluba ka nung tetuyuba agütsü ta osang angazüker.
Iba nung ajemdaker, lungkak aitertemi tan ita atema lungkak aitba sentong anena atatsü lemtet saka April 30 tashi nung parnok nem appointment orders magütsüra lungkak aitba sentong tenzüktsü, ta parnoki metetdaktsü.
RMSA Phase 2 & 3 candidate temi April 8, 2016 anogo nungi lungkak aitba sentong agitsü tenzük.
December 14, 2013 nung RMSA kübok secondary tesayur 900 den teimba anioktsü advertisement agütsüba atema parnoki tatidang agütsü. May 24, 2014 nü written exam agiba osang June 27, 2014 nung adok aser iba sülen July 2015 nung viva voce agi aser iba indang osangji November 30, 2015 nung metetdaktsü, ta lungkak aitertemi ashi.
Iba asoshi Department-i shimtetba candidate 600 den tema nem appointment letters agütsü saka parnok 111 nem tang tashi appointment letters magütsür, ta parnokisa shisem.