RMSA inyakyim ajanga Ao oshi langtsüngi alutsü

– S. T. Yapang Lkr. Kohima.

RMSA; koba linük nung kaket shisatsü sayua oshi oben wazüka ayuba den meimchir nüchi kümdaktsütsü asoshi tanelar wadang mesüka ‘mission’ ta nungloktsü, iba ajanga asen Ao oshibo langtsüngi dang alutsüsa ajiteter.
Rashtriya Madhyamik Shiksha Abhiyan (RMSA), Education Mission Society, Nagaland: Kohima ajanga advertisement NO. SCERT/ RMSA/ Exam/2013-14/9&10 Dated 27 January 2014 nung Ao tesayur 20 shimtsü sangdong, saka tesayur 5 dang shim, iba amala ashikülak nungi takok angutsü merangba mapang ka nung ano asenok temesüzüker amai post tasen tertrok (16) sangdong, saka tasen adoka aliba nungji inyaktsüsa temsüa mali. Tang tasen tertrok sangdongba nung class 12 nung danga Ao subject agia lira aser pa/lai graduate asüba mapang marks 45% tema ngua lira agitsü ta lir, anungji lanur tajung kari class 12 nung Ao subject agia lira aser graduate asüba mapang 45% dang timba ngua lira pa/la Ao oshi nung class 12 dang azüng sürnung class ter tashi sayutsü, aji kanga shisabulua bilemtsür, saka shirnok ASLB ajanga küm aika Arangtet Tatidang agia Ao oshi nung MA tashi akushia renemer lir parnok graduate asüba mapang tanga oshi nung marks 45% alema mangu nungji metemsü akümer, anungji asenok peladaktsüa post tasen tertrok sangdongaka Ao oshi sayutsü tetemsü shimtsü RMSA pur sentong nungji mali, aser aji Nagalima nung yimsüsürtemi renem, saka itemji melenshidaksütsüji nübur dak tashi lir ta amanger.
Ao Senden Literature Board (ASLB) ajanga kümsa küm angazükdaktsüa sayua arur Arangtet Tatidang ajangteta Ao oshi nung MA tashi renemer alir rogo, mapa mengui alirtem Ao nung jungaka tanga subject nung Graduate asüba mapang 45% marks tashi mangurtem dang lir, anungji ano küm ka ana post aika adoka sayuaka yangji asenok Aor tesayur tetemsü meshimtettsü, ajidang masü tesayur post dang nungi nisung ang ishiba alitsü, tanüngba post-ji yaküm amato tanga kin ka nungi shimtsü. Ashiko küm anasemka tsüngda RMSA ya anenadoktsü, kechiyong ibai teti asoshi masü, ya mission mapa ka nungloktsüba dang. Pei tetsü oshi sayutsüsa tesayur post tasen adoktsü asaktsü, tang RMSA ajanga shima alir ya meilongi state shilem nungi regular kümtsütsüsa nükla nung angur. Tang Nagalima nung kin kati iba maongka agitsü asoshi Nagalima nung tetsü oshi sayutsü tesayur post kwi adokdir ajak par agitsü aser Nagalima nung par oshi dang akümtsü aritepba mapang ka lir. Tang Nagalima yimten yimsüsübaji item shisa bener alirtemi ama lir, aser sentong ajak pai atonger ta repranga arur.
Sorkar-ji nübur asoshi takoksa bener arutsütsü tentetba masü, ajisüaka tetibo nübur taginübaji mataloktsüteter asünungji nüburi kangzüker mesüra tongtepratepa jembir tajungtiba ka renemer.
Asen Ao oshi sayutsü kanga tsüka runga nüngdakba mapang ka; graduate asüba mapang marks 45% menguaka pai/lai ASLB ajanga küm aika tatidang agiba Arangtet Tatidang nungji junga takok ngua lira aser tesayur tatidang nungji junga langzüteta marks temsüa ngura shimtsüsa jembizüktsü/kangzüktsüji Aor mapa, asenok temsüa melira tanga kin shirnok oshioben nung talangka or lir, parnok dang tesayurtemji shimtsü, anungji ya ‘shiba aka pa nem tali agütsütsü, shiba mapa pa kechi aka ajia pa nungi bener aotsü’ ta ashiba to asangsang nung ataloker alitsü.
Joko tajungren agi tembanga marutettsüsa kümra Advertisement NO. SCERT/ RMSA/ Exam/2013-14/9&10 Dated 27 January 2014 nung Ao tesayur 20 shimtsü sangdongba nung tatidang agütsür ajaki tatembangbuba tebang o asüngdangba (Viva) tashi marks junga nguaka tejashitsüka tesayur 5 dang shim, anungji tanüngba meshimertemi nisung shiai ishiba agia sen crore anana temenok meshia okadak keno benoktsü ni okatsür mesüaka ni ajungshir.
June 30, 2010 küm nisung mejangjai noksa aibelena adoktsüba nungi atsütepa orr ‘Times Now’ 24×7 English News Channel dang Imkongnükshi Imchen nem temenok sen crore ka agütsütsü December 8, 2015 anogo, Civil Judge (Senior) Division, Dimapur okadaki obendang agütsüba asenoki meteta lir, süra kaketshir meshimtsü sürnung temulung lemdaktsüba, senti mapang laludaktsüba, senotsü jenti intokdaktsüa olioradaktsüba, temulung lemdaktsüa lir teti asoshi tejashi mulungsentsü arudaktsüba, parnoki (RMSA puri) asüngdangba ajak langzüteta marks junga ngur  tatem nung ‘metemsü’ ta ashiba asoshi temenok angutsü kangasa temsüa lir ta bilemer. Ajisüaka okadak mapang indok dang asen oshibo lujen alutsü, anungji lokti tentet kati tiyongi yia tajungtiba ka renemtsütsüla aser ibaji Ao Senso Telongjem Dimapur dak imlaa atar.