RMSA nung shimba candidate temi lumia lungkak aittsü amokmerener

April 11, 2016 nü RMSA Selected Candidates-i RMSA Nagaland Mission Director Office Kohima kima nung anogo tanabuba lungkak aitba noksa nung angur.

Kohima, April 11 (TYO): Rashtriya Madhyamik Shiksha Abhiyan (RMSA) Phase 2 & 3 nung shimba candidate temi tanü agi anogo ananübuba lungkak aitogo aser parnoki lumia lungkak aittsü, ta amokmerena metetdaktsü.
Sorkari Bodbar tashi nung parnok nem ‘appointment orders’ magütsüra lumia lungkak aittsü ta tanü parnoki ashi.
RMSA Nagaland office kima nung mener lungkak aitertemi “Temetenji nisung ajak nem agütsütsüla”, “Kechiba 2nd & 3rd phase dang?”, “Onok nem appointment agüjang”, “Onoki onok tangutsü tim atema akhanger” ta yimyimtem ayim.
Tanü tashi nung bangdak ketdangsertem nungi telangzüba kecha mali aser Bodbar tashi nung telangzüba kecha melira lumia lungkak aittsü ta lungkak aitertemi ashi.
RMSA phase 2 & 3 selected candidate parnok 110 ya yaküm written aser viva voice nung shimtet saka appointment orders magütsü. Iba jagi parnoki taoba Hokolbar (April 8) nungi takhangba agüja lungkak aittsü tenzük.
Nagaland kübok district ajak nung candidate nem appointment orders agüjang ta parnoki takhangba agütsür.
RMSA phase 2 & 3 Candidates Forum-isa sangdong ka nung ANCSU aser NPCC dang pelaba metetdaktsü.
Tangatetba tajung aliba sensotem aser telok balalai parnok pusema nungittsü mepishir ta RMSA phase 2 & 3 Candidates Forum sangdong nung shia lir.
Sangdong nungsa candidate ajak anepdang 9:00 ako nung RMSA office kima atongtsü metetdaktsüogo aser marurtem lateta aliba ama takhang alitsü ta shia lir.