RMSA nung takok angurtemi ‘appointment order’ meshia lungkak aiter

April 8, 2016 nü RMSA Nagaland Mission Director’s Office, Kohima nung RMSA tatidang nung takok angur candidate temi lungkak aitba noksa nung angur.

Kohima, April 8 (TYO) : Nagaland nung Rashtrya Madhyamik Shiksha Abhiyan (RMSA) kübok shimba candidate 110 shi kati tanü mapang telatet makai lungkak aittsü tenzükogo.
Secondary tesayurtem atema shimba RMSA candidate temi Hokolbarnep nungi RMSA Nagaland Mission Director office kima nung mener lungkak aitba sentong tenzük aser parnoki ‘appointment order’ tangsa tang agüjang ta takhangba agütsür.
December 14, 2013 nung RMSA kübok secondary teachers 900 shimtsü osang sangdongba atema tatidang agütsüba nungi parnok shimba lir, ta lungkak aitertemi ashi.
May 24, 2014 nü RMSA tesayur indang written exam agi aser iba indang osangji June 27, 2014 nü yimjak nung metetdaktsü. Iba sülen July 2014 nung viva voce agi aser iba indang osangji November 30, 2015 nü metetdakja liasü.
Result adokba sülen Department-i shimtetba candidate 600 shi ka nem appointment letters agütsü saka tanüngba 111 nembo appointment letters magütsüi lir, ta tanü lungkak aitertemi ashi.
Yaküm December ita tom ka nung appointment mezüngbuba shilem mapa küma inyak saka shilem tanabuba aser tasembuba atema appointment maparen meinyaker, ta parnokisa ashi.
Yaküm tatembangba result adokba sülen parnoki bangdak ketdangser nem job acceptance letter agütsü. Nisung karbo pei teinyakdak mapa toktsütsüsa aküm, saka tanü tashi parnok nem appointment letters magütsür, ta lungkak aitertemisa shisem.
Iba dak sendakba nung taküm March 14 nü parnoki Mission Director, RMSA Nagaland nem tezüluba ka agütsü aser March 28 nü pa den ajurutepa khuret lemsatep. Iba mapang Mission Director-i parnok dang April, 2016 hopta tanabuba tashi ata-liang ta ashi. Ajisüaka, yashi parnoki Mission Director den ajurutepa tezüluba nung tenangzükba agütsütsü asüngdang, saka idangji Mission Director-i kecha menangzüktet, ta lungkak aitertemisa ashi.
“Küm ana tashi onoki arema ataa aruogo, saka onok teimla samaogo. Iba jagi temeten angutsü atema onoki lungkak aiter. Taruba anogo ishika tsüngda bangdak ketdangsertemi telangzüba tajung magütsüra, onoki lumia lungkak aittsü” ta RMSA candidate tem rongnungi teshimtet nübo, Iheilung-i ashi.
Asüng aser yanüji sorkar sodi anogotem lir, anungji taruba Hombar nungi parnoki maneni lungkak aitba sentong agitsü.
Iba dak sendakba atema Mission Director RMSA Nagaland den tongteprateptsü merang saka pa tanü official mapa kar atema Delhi-i ogo ta osang kar ajanga angazük.