RMSA oral tatidang Aug 5 tashi nung agitsü: Edn. Minister

Kohima, July 21 (TYO): Tzünglu aruaka tanü Kohima, Secretariat lemjem nung Nagaland Rashtrya Madhamik Shiksha Abhiyan (RMSA) candidate noklang aika adenshia ozülu balala amer lungkak aitogo.
Nagaland Rashtrya Madhamik Shiksha Abhiyan (RMSA) Written Exam 2014 Qualified Candidates Forum-i State Assembly senden tenzükba maongka agia state sorkar nem parnok takhangba agütsüogo.
Parnoki ozülu balala ajanga, yaküm written tatidang nung takok angur candidate tem oral tatidang July 31 tashi nungbo agitsüla, ta akhang.
“Onoki, o agi masü saka mapa agi inyakdaktsünür,” ta parnoki ashi.
Parnoki department nem agütsüba shidi nungji, RMSA kübok secondary teacher recruitment 2014 atema viva voce tekaraba nung agitsüla, ta shiogo.
Lungkak aiter candidate temi ashiba agi, Assembly senden sülen Minister for School Education & SCERT, Yitachu aser department ketdangsertemi par lenirtem ajuruogo aser minister-i parnok dang oral tatidangji August 5, 2015 nü tashi nungbo agitsü ta shiogo.
Minister dang nungi iba telangzüba anguba sülen Nagaland RMSA Written Exam 2014 Qualified Candidates Forum-i lungkak aitbaji anenogo.