RMSA tatidang agüja alirtem longkak aittsü

RMSA asoshi agiba tezüluba tatidang nung takok angurtemi parnoki mepishiba ama tebang o tatidang  tan July ita tashi nung agiang ta takangba agüja July 21, 2015 anogo nungi longkak aittsü lemtetba mapang agiba noksa ka yangi angur. Kohima, July 18 (TYO) .

Kohima, July 18 (TYO) : Nagaland nung RMSA sentong kübok tesayur aser sports instructor-tem shimtsü asoshi May 24, 2014 anogo nung tezüluba nung tatidang agi aser iba result-ji June 29, 2014 nü adok. Iba sülen tang küm ka dak tali süir külen tebang o tendangtsü asoshi B.Ed degree alirtem dang ajabaji B.Ed magiba purtem mezüngmeshiba mapa ka asütsü ta Nagaland RMSA Writtem Exam 2014 nung takok ngua alirtemi metetdaktsüogo.
Tanü Honibar nü Kohima local ground nung “Nagaland RMSA Written Exam 2014 Qualified Candidates Forum” lokti senden ka aliba mapang Nagaland nung district shia nungi parnok ajak agi nisung 923 dena liasü.
Iba Forum yagi June 15, 2015 anogo nung sorkar dang RMSA tezüluba tatidang nung takok ngua alirtem den külemi Sports Instructors dena June 30, 2015 tashi nung tebang o nung tendangtsü asoshi anogo metetdaktsütsüla aser item maparen ajakji July 31, 2105 tashi nung renemtsüla ta temepishiba shidi ka agüja lir.
Item mapatem inyaknertem asoshi tatidang agütsütsü atema December 14, 2013 nung ajaba sangdong nung shia aliba agi iba tatidang ya Bachelor’s Degree alirtem ajak agütsütsü akok ta metetdakja lir. Ajisüaka, item mapatem asoshi tezüluba nung tatidang agütsüba result adokba sülenbo tebang o tatidang agitsü atema B.Ed degree alirtem dang ajaba jagi B.Ed degree malirtem kangasa mezüngmeshiogo ta parnokisa metetdaktsü.
Iba ama tim mesüi inyakbatemji metongshir shitak inyaktsü mepishiaka, sorkari mangaba anema tejashi sayua July 21, 2015 anogo nungi parnoki akangba mataloktsü tashi longkak aita amongtsü ta iba Forum-isa metetdaktsüogo.
Iba longkak aitba sentong nung adentsü asoshi RMSA candidate ajak July 21, 2015 anepdang 8:00 ako nungbo Kohima nung Secretariat Gate atongtsüla ta Forum lenirtemisa metetdaktsüogo.