RMSA tesayurtem class nung medeni lungkak aiter

Kohima, April 17 (TYO): Nagaland nung CSS kübok shimba RMSA tesayur meyirjang ka da tema tanü nungi tenzüka anogo asem class-i moi lungkak aittsü tenzükogo.
Iba sentong ya Nagaland Rashtriya Madhyamik Shiksha Abhiyan Teachers’ Association (NRMSATA)-i ketdangsüa ayonga agir aser tesüiba ita pungu tashi itasen magütsüba anema parnoki April 19, 2017 tashi lungkak aittsü.
April 6, 2017 nü parnoki sorkar nem anogo tenetnü züngzüktsü saka April 13 nü anogo süiaka, sorkar nungi telangzüba kecha mali. Iba jagi tesayurtemi lungkak aittsüsa akümer, ta NRMSATA president, Renbemo L Patton-i osangbener dang ashi.
Tesayurtemibo timi angatetteptsü aser olemteptsü atema renema lir saka sorkar nungi osang kecha mali. Anogo asem tsüngda sorkari osang kecha magütsüra, parnoki state ajunga nung poster campaign ka agia lungkak aitba sentong tanabuba tenzüktsü, iba sülen tasembuba sentong nungbo Directorate of School of Education (DoSE) aser Civil Secretariat nung mener lungkak aittsü, ta Renbemo-ia shisem.
“Meta talang pilar aliba tesemtem nung mapa lemzüka aliba tesayurtemi kodaser pokzüng nung mapa inyaktettsü. State sorkari state employee atemabo süoki ia bilemtsür saka CSS ajanga shimba tesayurtem atemabo mebilemtsür. Onok nem ita pungu tashi itasen magütsür. Onoki yamai lungkak aittsü tebilemba maliasü saka tanga lenmang kecha maliba agi lungkak aittsüsa akümer” ta paisa metetdaktsü.
NRMSATA general secretary, Kezhothito Keyho-ia ashiba agi, “tang anogo züngzüktsüba ajanga sorkari onok indang khuret angatettsü imlar. Onok itasen mongui timtemer saka sorkari tesayurtem indang khuret atema mebilemtsür.”
Tesayur aika sentsüh agi tsübanga lir aser taküm liyonga aotsü atema tetsükdaktsü tulu ajurur. Tesayurtemi inyakba atema taa shitak magütsüra, onoki mapa inyaka moutettsü. Onoki joko maremzükteter, ta Kezhothito-isa ashi.
RMSA tesayurtemi nüngdakba qualifications ajak agüjaka, sorkari temeten magütsüi ‘contractual employees’ ta dang shimokba atema ta NRMSATA ketdangpurtemi mepelaba olen ka ashi.
Iba dak sendakba nung parnokisa ashiba agi, RMSA indang guideline aser framework reprangshimtsü atema parnoki Chief Secretary, Commissioner & Secretary aser Director RMSA nem tezüluba ka agütsüogo.