RN Ravi-i Nagaland Angh atema tenangzükba agi

Kohima, Luroi/August 01, 2019: Brihostibarnü Durbar Hall, Raj Bhavan Kohima nung Gauhati High Court Chief Justice (Acting)-i ketdangsüa Nagaland Angh inyaktsü atema RN Ravi nem tenangzükba agidaktsüdang tangokba noksa nung angur.

Kohima, August 01 (TYO): Brihostibarnü Durbar Hall, Raj Bhavan Kohima nung Nagaland Angh (19buba) inyaktsü atema RN Ravi-i tenangzükba agiogo, ta PRO to Governor sangdong ka ajanga metetdaktsü.
Gauhati High Court Chief Justice (Acting)-i ketdangsüa pa anem tenangüzkba agidaktsü; iba sentong nung Nagaland Chief Minister, Deputy Chief Minister, NLA Speaker, Opposition Lenir, Minister tem, Advisor tem, MLA tem, sorkar tongti ketdangsertem aser Central sorkar nungi ketdangsertem den tongtibang nisungtem dena liasü.
Kasa sentong nung taoaba mapang Chief Minitser aser Angh, Dr SC Jamir, taoba mapang Chief Minister KL Chishi aser MP (Rajya Sabha), KG Kenye nungera aden.
State Chief Secretary, Temjen Toy, IAS-i Warrant of Appointment zünga metetdaktsü.
Iba sülen Raj Bhavan moapu nung Nagaland Police-i Angh tasenba nem Guard of Honour agütsü.
Iba sentong nung jembidang Angh tasenba, RN Ravi-i, “Nagaland Angh mapa agizüka ni nenok ajak dangi salem abener. Ni Tir aser Ato kilonser na dang pelar. Ni linük temzüng nung ajemdaker kü khuret abentsü. Iba ama mapang nung ni Nagaland nung alirtem anibelem arema tenzüktsü atema nangzüker,” ta metetdaktsü.
“Küm 30 tejaklen iba tepor tajung li aser nüburtem ajurutsü atema Tsüngremi kü nem maongka agütsü, aser iba mapang nungjagi tenzüka nenok den kü tesendaktep kanga inogo. Nagaland nung alirtemi kü dang meimba aser taamng katetba atema pelarTang kü nem lemzüktsüba mapa ya Tsüngremer sentong ta bilemer,” ta paisa metetdaktsü.
“Meimchir putiotsü nung tang amai terenlok yamai kera maliasü. Advanced Artificial Intelligence, Quantum Computing, Advanced Data Analytics, 5G network, robotics aser genetics ama technologies ajanga tanü temelenshi kanga adokogo. Nüburtem atema Nagaland nung lanurtem item technologies nung mongin akümtsüji kü mangdang lir,” ta pai ashi.
“Ato kilonser Narendra Modi lenisüba kübok India nunger alizüng atongtsü lenmang nung jajadar. Linük nüburtemi pa dak tamng kateta takok tulu ngudaktsüogo. Naga yimtenren onük tekaraba nung akhümketa latettsüji pai bilema lir. Naga nungeri akümketa agizüktettsüsa tekaraba nung yimtenren onük latettsü atema ni kanga nendaka inyaktsü,” ta pai metetdaktsü.
“Iba ama tongtibang sentong ka nung ni Nagaland nung alirtem, talisa lanurtem dang Nagaland asentenshitsü aser India kübok tanga state tem atema tatishitsü aketaba state ka akümtsü asoshi asentenshir inyaktsü ayongzüker,” ta paisa shisem.