RN Ravi pelaa agizüker: K Therie

Kohima, August 02 (TYO): R N Ravi, Nagaland-i aruba atema pelaa agizüker aser amapa tasenba junga inyaktsü atema bilemtsür, ta tanü NPCC Tir, K. Therie-i sangdong ka ajanga metetdaktsü.
“Ni pa asübo, Nagaland-i arutsü agibo kü nem yimtenren tebilemtsü onük tama bentettsü atema kü nem temelaba agüjang ta shila. Ajisüaka pa kü dang shisa takaba aser sentong tajungba alitsüa akok, asenoki reparanga atadi. Pa Nagaland nung tang tasen masü aser pai state tensa indang meteta lir. Ceasefire Agreements ji India temzüng dang nungi temaba ta pai meteta lir aser tangbo Nagaland nung asenok sorkar 10 lir aser terenlok tsütsü kecha meliaka sen rakzükraktemer,” ta sangdong nung shia lir.
“Pai parnok den ken o jembia liasü aser Naga nunger aika dang nungi pai parnok temetetba. Iba nükjjidong nung telok ajak longjema lir ta pai meteta alir. paisa nüburtem timtem aser nüburtemi tyimjungm terenlok aser sen aazütsü maongka aginüba meteta lir,” ta sangdong nung shia lir.
“Tang menden melenshia India temzüng kübok state nung tekolak ka ama pai state nung ozüng benoktsü. Pai ochi temeden agütsütsü, sorkar ka saru ka aser ochimashi maliba sorkar ka alitsü atema pai inyaktsü asenoki yongyaa atar. Naga nunger aser opposition ji tsükchirtem ama mezüngshitsü saka democratic sorkar ka nung tajunglen agi shilem agirtem ama züngshitsü atema ni pa dang mepishir,” ta paisa metetdaktsü.