RO-i party tem, candidates, observers den senden amen

Kohima, Metsüremi/March 28 (TYO): Brihostibarnü Kohima nung Commissioner & Returning Officer, Nagaland indang Conference Hall nung Commissioner & Returning Officer, Nagaland, M. Patton aser ADC (HQ) & ARO, Limanenla nati taruba Lok Sabha Election 2019 aser Nagaland Parliamentary Constituency bye-election dak sendakba nung yimtenren party tem, election nung tokteper candidate tem aser General & Expenditure Observers den senden ka ayongzüka menogo, ta ketdangsertem osang ka ajanga metetdaktsü.
Senden nung Commissioner & Returning Officer, M. Patton-i yimtenren party tem, agents aser candidate tem dang Election Commission of India (ECI)-i tuyuba telatetbatem ajak benshitsü metetdaktsü.
Election mapang sen teindokba osangtem bendentsüji kanga tongtibang, ta shia General & Expenditure Observers-i party ajak dang Election Commission telatetbatem benshitsüla, ta metetdaktsüba den külemi parnok dang inspection aruba shia mapang ajak nung election dak sendakba nung sen teindokba files sayutsü metetdaktsüogo.
Iba dak alia Observers-i yimtenren party tem dang election dak sendakba metetpelanüba lira mashie mapang nung asüngdangtsü metetdaktsüogo, ta ketdangsertem osang ajangasa metetdaktsü.