Robben iba season tembangba sülen Bayern toktsütsü

Luchii/December 3, 2018 (Agencies): Bayern Munich nungi küm 10 asayaa arur Arjen Robben-i Amungnü, iba season tembangba sülen club toktsütsü, ta sangdongogo.
“Iba küm ya kü asoshi Bayern nung tatembangbuba küm asütsü. Küm 10 jangretama asayaogo,” ta Robben-i Tegernsee nung Bayern fan club meeting mapang ashiba Dutch newspaper Algemeen Dagblad-i sangdonga liasü.
“Iba jenjang agiba ya shidak aser tang sangdongtsü mapang tajung ta bilemer. Ni iba telemtetba ya hopta ishika tejakdang agi aser fans temi tang kü jenjang jangjaogo. Iba ya jenjang tuluka lir. Kü arishi küm den apira ni temaba jenjang nung asayatetba ya tesüngmangtsüka lir,” ta pai ashi.
Ajisüaka paia ashiba agi, pa taruba season atema offer atadar.
2009 küm Real Madrid nungi Bayern-i arua adenba sülen Robben-i asaya 305 nung goal 143 idaktsüogo aser assist 101 süja lir.
Pai 2013 küm Champions League final nung goal idakja par telok takoki ani aser Bayern nungi asayaba mapang Bundesliga title tenetben benogo.
Robben aser Franck Ribery, 35 naprongla Bayern nung taküm contract atemtsü aser tir Uli Hoeness-ia Amungnü, tena asoshi iba season ya tatembangbuba asütsü akok ta shiogo.
“Ribery aser Robben na atema iba season ya tatembangbuba asütsü akok,” ta Hoeness-i Bayern fans dang ashi.
“Position nung temelenshi kar adoktsü, onok transfer policy kanga aggressive asütsü,” ta paisa ashi.
Küm nung tain kümaka Robben-i tang tashi junga asayaba kuli agütsüogo.
Pai taoba Sangtennü Benfica goal 5-1 agi akokba asaya nung goal ana tashi idakja liasü aser iba asaya akokba ajanga Bayern pur Champions League last 16 tongogo.