Robbie Williams-i kibong mekümnüi liasü

October 29, 2016 : Kentener Robbie Williams-i pa taküm jenjang nung takoksa alutsü arendaka bilemba agi kibong küma tanur angutsü sentong maliasü saka pai kinungtsü Ayda Field ajuruba sülen temulung khenyongi melenshiatok.
‘Candy’ ken kanga nüngutgu küma tentetsang, Williams-i tangbo kinungtsü Ayda Field aser tanur ana, Theodora, (4), aser Charlton, (2) nunger melira pa taküm melitetsü amai bilemer.
Ireland Times osangbenertem den jembidang pai, “Ni kibong makümtsü aser tanur mangutsü tenangzükba agir liasü,” ta ashi.
“Ni meketa aliba nisungtem reprangdangdang kibong akümbaji tetsükdaktsü tulu ama ni bilemer. Kanga animesüngzükteti alitsü amai ni bilem aser ibaji ni maginü. Ajisüaka ni kibong kümogo, tanur ana lir aser tesüba mapang tang nungi tang kanga jangratatemba lir,” ta pai ashi.
Arishi küm 42 tain kentensangi tamalen kibong mekümnüi bilema liaka tangbo pai, tsürabur ka akümbaji alima nung jangratemtsü rongnung tulutiba aser taküm nung nükjidong ka angutsür ta ashi.
Pai, “Asenok tanur atema alitsü aser inyaktsüsa akümer, aser ibaji mapa lir,” ta ashi.
Aji oda süaka Robbie-i 2010 küm agila, kinungtsü aser tanur ana yutsür mapang talangka ainlen jajatsüsa akümtsü kechiba süra pai sangküm UK aser Europe nung stadium tour jajatsü sangdongogo.
“Sangküm June ita nung ni stadium tem nung ‘Heavy Entertainment Show’ bener arutsütsü. Anogo tejangja November 7, 2016 nü metetdaktsütsü,” ta pai Facebook ajanga metetdaktsüogo.
Sangkümsa ano pa tesüiba mapang dena aliba kentener telok, Take That küm 25 ajungba tour nung pa-a dena shilem agitsü imlar.
Pai, “Ni Take That den lungjemer langkabosa inyakner saka ni memetet kechiba süra sangkümsa kü kensep atema ni tour aotsüba lir,” ta ashi.