Robbie Williams Take That telok den lungjemer

Los Angeles, April 16, 2016 : Kentener Robbie Williams-i tang Take That kentener telok den lokteper kensep ka adoktsü atema inyaktepdar.
Arishi küm 42 tain, Robbie-i par telok indang ‘Greatest Hits’ kensep adoktsü atema ken zülutsü aser menüngoktsü atema tesüiba mapang pa dena aliba kentener telok Take That den lungjemogo.
Iba telok nung Gary Barlow, Mark Owen aser Howard Donald nunger lir aser tan menüngokba kensep ya par telok tenteter 2017 nung küm 25 ajungba jubilee mong mapang sayatsü sentong lir, ta femalefirst.co.uk osang ajanga metetdaktsü.
“Pai telok atema tebilemba tasen bener arutsü jangrar aser yamaji pa dak tebilemba tajung aika lir,” ta The Sun osangkaket ajanga ashi.
“Robbie ya tangbo kanga melenshiogo aser pai mapa ajak kanga bendanga agüja aser nendaka inyaker,” ta kasa osang ajangasa ashi.
Robbie-i par telok ya 1995 küm toktsü saka 2010 küm tanaben oa dena “Progress” kensep parnok külemi adok aser iba sülen “Progress Live” tour nunga pa dena kenten sentong tem agia jaja.
Ano 2012 küma pai telok toktsü, ajisüaka par telok nung lenisang, Barlow-i, na kodang meyipa arunüdir arua adentsü nokdanga mali, ta aiben pa dang shia liasü.
“Ni telok den lungjemer shilem agitsü mulungtetogo. Iba telok den adendangang temulung nung anisüngzük angur,” ta Robbie-i ashiba kasa osang ajang metetdaktsü.