Robert Redford joko film ana nungang shilem agitsü

Los Angeles, November 12, 2016 : Hollywood actor tejen Robert Redford tang tatemsa film ana nung shilem agiba sülen anisüngzüktsü.
Par semchir Dylan den interview agiba mapang Redford-i otsü ashiba aser noksa yangluba mapaji kanga nüngdak ta ashi aser pa film nung shilem agiba nungi anisüngzüker film direct asüba aser noksa yangluba nunga temulung agütsütsü metetdaktsü, ta variety.com osang ajanga metetdaktsü.
Dylan-i tebuo Redford dang nai ano tanaben noksa yanglutsü jangrar asü ta asüngdanga liasü.
“Hao, ni noksa yanglutsü kanga jangrar aser tang film nungi anisüngzüktsü asüba agi ano tejangraba kümogo. Ni ya kanga matatet nisung ka lir anungji kecha meinyaki kazütsüji kanga tasak. Ni tang arishi küm 80 lir aser shinga daka metaloker malir anungji noksa yangluba agi ni pela alitsü. Tesüiba mapai tanaben meyipa aotsü aser kü tebilemba ibaji tang lir,” ta Redford-i langzü.
“Ni film nung shilem agitsü masü saka noksa yangluba nunga temulung agütsütsü bilemer,” ta pai shisem.
Redford-i ashiba agi, pa film nung mapang talangka shilem agia aruba sülen tan tatemsa film ana — “Our Souls at Night” aser “Old Man With a Gun” — nung shilem agir külen anisüngzüktsü. “Our Souls at Night” film nung pa actress Jane Fonda den külemi shilem agitsü aser “Old Man With a Gun” nung actor Casey Affleck aser Sissy Spacek nunger den külemi shilem agitsü.
“The Sting” film nung tongti shilem agisang, Redford-i tesüsabuba shilem agiba film ji 2015 küm tangokba “A Walk in the Woods” film lir. Iba film ya tembar ana mapang talangka pilar aliba otsü lir.
Redford-i 1980 küm direct asüba “Ordinary People” film ajanga pai director tajungtiba Oscar sempet angu aser iba den külemi 2002 küma Academy award angu.