Rocky Club-i 10th Marsosang Football marok benogo

Rocky Club-i 10 buba Marsosang Football asayamung marok agizüker külen tongti tesemdanger O. Bendangyanger den match officials aser tayongertem külemi tangokba noksa nung angur. Chuchu town, Dec 19, 2015.

Chuchu Town, Dec ember 19 (TYO): Rocky Club-i ayongzüka Dec 10 nungi 19 tashi yangi Govt. High Sschool Chuchuyimlang play ground nung 10 buba Marsosang Football Trophy 2015 sentong takok manung asaya mungogo. Taküm iba asayamung nung telok ajak agi 11 liasü aser item rongnung Rocky Club tajungtiba süa parnoki Champion benogo.
Final match Rocky Club-i N. Obangtemjen Team madak tie break nung goal 3-0 agi takok angu. Takoker Champion team nem tanga senpet den sen 1 lakh agütsü. Tanabuba jenjang angur nema tanga senpet den sen meyi tenem (50,000/-) agütsü. Semi finalists ana Young Naga Club aser Aruju Club nema sen 5000/- (each) senpettsü.
Iba den nija aser tanga senpet angurtemji; Best discipline team -Young Naga Club, Most Promising player – Aoliba (Rainbow Club), Best Goalkeeper – Molongsungit (Metju Sporting Club), Best Player – Alem (Aruju Club) aser Highest Scorer – Moatemsu, 6 goals (Young Naga Club) nungertem liasü.
Tanü iba asayamung shipangtsür Nagaland Agriculture Director, O. Bendangyangeri jembidang, iba ama yimtsüng aser town sasep nung asayamung ayonga lanurtem nem sabang lapoktsübaji jangaratemtsü aser yangi nungi terayanga state, national aser international level tashi tongteta asayaa aotsü imlar, ta ashi.
Alima nung asayar tajungtemji anüng nungi pasasa tsükba masü, saka parnoka iba ama asayamung balala nung asayaa tenzükba indang paisa nüngtugu footballer kar atishia ashi. Iba dak sentakba nung paisa asayamung ayongertem dang pelaba den iba ajanga asen lima nungi asayar tajung aika adoktsü teimla o ka ashi.
Mapang apir tangalen nungi National coach-tem anir arua asen liso asayar nem coaching agütsütsüla, ta paisa lanurtem anitentsü asoshi tebilemba ka lemsatep.
Paisa asayartem dang dang inyakdaktsünüba olen ka ashidang, asayar taküm kaji Laishir (theologian) ka den temerükba aliba den bendanga agüja asayatsüla. “Asayaba ya joko mapang indoka masayai pei mapa küma iba ajanga tepok sünga alitsü asoshi asayatsüla”, ta paisa ayongzük.