Rocky Handsome film-i tang tashi nung sen crore 7.06 aaogo

New Delhi, March 27, 2016 : Bollywood film tem nung actor aikati shilem agitsüsa aser sen aika alangba tesemtem nung tangoktsüsa yangluba ajanga film ajanga kechi shiner ibaji aiben amatoker.  Ajisüaka Nishikant Kamat-i yangluba ‘Rocky Handsome’ film agi iba tetsüngda tulu mesemtsür.
John Abraham-i action film tem nung pa dak sempet aliba ajak sayuogo ta bilema lira iba tebilembaji khenyongi tai kechiba süra iba film nung pai o aika mejemer saka tereprangertem ajak, ano iba sülen ya kechi ang asütsüar na, ta yongyaseta atadaktsür.
Arishi küm 43 tain, John-i shilem agiba film ‘Rocky Handsome’ ya tanga film yangluba yimya dang nungi khenyongi balaka lir aser ibaji ajanga tereprangertem kanga jangradaktsür.
Iba film yagi Goa nung drugs amshiba, küm agi matongdang teküp ayokba aser temang shilem ayokba mapa tamajungtem onsara buluba ajanga yimti nung aliba ketdangsertem animesüngzüktetdaktsüba sayur. Iba ama tensa ka nung Rocky Handsome (John Abraham)-i yimti nung ozüng alema benshirtem jazüker.
Iba film nung action shilem ajak kangasa junga tangoktetogo. Film nung züktepba shilem karbo asangsang nung zükteper amai tangokteta lir. Film nung John temang body-builder dang nungia tajungba aser teti ama tereprangtsü kanga junger adoker.
Iba film nung Shruti Haasan shilembo kanga mali. La adokbaji ken anashi nung lir aser ibaji ajanga film nung John tena medemba kangabo bulua mali.
TV nung shilem agir Sharad Kelkar-ia ANC officer ka ama kanga junga shilem agia lir.
Film nung  ‘Rock the Party’ ken ajanga tereprangertem kanga jangratemdaktsür aser iba ken nung Nora Fatehi-i shilem agia lir.
Director Nishikant Kamat-ia film nung nisung tamajunger shilem kanga junga agia lir.
Iba film ya March 25, 2016 nü saya aser tang tashi nung sen crore 7.06 aaogo.