Roger Federer-i Rio Olympics nung shilem magitsü

Lausanne, July 27 (Agencies): Switzerland nunger tennis asayar mongin, Roger Federer-i 2016 Rio Olympics nung shilem magitettsüsa akümba den külemi, taküm 2016 küm tetoktepba ka nung danga toktepa shilem magitettsüsa akümba osang ka tanü, Bodbar nü metetdaktsüogo.
Taruba August ita arishi küm 35 tain akümtsü alisang, Federer-i taküm February ita temokok operation agitsüsa akümba den külemi, teberem timtem adoka taküm May ita asayaba French Open asayamong nunga shilem magitettsüa jenjang tamajung ajurua liasü.
“Kü temokok tanga junga manepi aliba yong ni Rio Olympics nung ozü Switzerland linük tenüng nung toktepa shilem magitsüsa akümba osang sasaseta metetdaktsür. Ano, taküm küm ayongba tetoktepba balala nung toktepa shilem magi anisüngzüka kü temang tajungba kümdaktsütsü lemtetogo,” ta Federer-i metetdaktsü.
Tawa Wimbledon asayamong semifinal asaya Milos Raonic nem kokdaktsüsang, Federer yirua French Open nung shilem magitetba ajanga pai Grand Slam takok marok 65 tashi atonga akokba otsü anentsüsa aküm.
2012 London Olympics nung Andy Murray sülen anidaka, tanabuba jenjang ngua bronze medal agizüksang, Federer-i tennis asayatsü tenzüker tanü tashi nung Olympic gold agizüktsü maongka monguteti lir.
Ajisüaka, pa temang tajung kümdakja taküm anisüngzükba sülen pai 2017 Australian Open asayamong nung shilem agiba jakdang Hopman Cup nung toktepa shilem agitsü renemba olen ka Federer-i metetdaktsüogo.