Rohingya Muslim refugee 7 Myanmar-i meyipa yoker

Guwahati, Mongputeni (October) 3 (Agencies): Assam sorkari Bodbarnü Rohingya refugee tenet tashi Silchar nung aliba detention camp ka nungi Imphal-i yokogo. Idak nung jagi parnok Myanmar-i meyipa yoktsü, ta sorkar ketdangser kati ashi.
“Par tenetji tanep detention camp nungi Manipur-i apusoa ogo” ta Cachar district nung deputy commissioner S Lakshmanan-i ashi.
Moreh nung Myanmar den arrtsü lir aser iba tesem nungi parnok Myanmar-i yoktsü. Rohingya Muslim nunger nisung tenetji 2012 küm nungi ozüng alema aruba atema Silchar central prison nung puoka liasü.
Sorkari Rohingya refugee tem meyipa meyoktsü tenokdangba agüjang ta advocate Prashant Bhushan-i Supreme Court nung PIL ka benokba sülen par tenet meyipa yoktsü telemtetba agi.
“Iba ya teti inyaka aruba mapa ka lir. Tawa tu onoki Pakistani ka, Afghani ka aser Bangladeshi nunger 52 meyipa yokogo” ta Assam Police indang Border Organisation nung additional director general Bhaskar Jyoti Mahanta-i osangbener dang ashi.
Intelligence osang ajanga ashiba agi, Assam kübok detention camp balala nung Rohingya refugee 32 shi puoka lir. Tezpur nung tanur 7 dena parnok 15 shi puoka lir.
Rohingya refugee temji Myanmar kübok Rakhine state nungi lir aser parnok 2014 küm government railway police-i apuba liasü ta osang angazüker.
Centre-i state ajak dang Rohingya refugee tem aser tanga ozüng alema arurtem indang biometric details bendentsü atema taoba hopta tetuyuba ka agütsüogo.
“Rohingya nunger ya northeast state tem nung masü tangalena lir. Parnoki Kerala dena India anüolentip tsütsü state tem tongogo” ta tawa tu Union home Minister Rajnath Singh-i ashi. Paisa India nung Rohingya nunger dang “illegal immigrants” ta jaloktsü.
Myanmar kübok Rakhine state nung Rohingya refugee tem sepaitemi tepsetogo aser iba ajanga parnok Bangladesh nung jenok.
UNHCR-i Assam nung Rohingya refugee tem pua alirtem ajuruteptsü atema asüngdangogo saka sorkari temelaba magütsüi lir.
India sorkari Rohingya refugee 7 Myanmar-i meyipa yokbaji international law alema inyakba mapa ka asütsü akok, ta UN human rights mongin kati ashi.
“Parnok maitsüji reprangdangra, parnok kümzüka ayutsü indang temeten magütsüba ama lir aser tashiyim agi parnok meyipa yoker ama züngshitsü” ta UN Special Rapporteur on racism, Tendayi Achiume-i ashi.