Rohingya nunger meyipa yoktsüla: Govindacharya

New Delhi, September 08 (Agencies): Hokolbarnü taoba mapang BJP lenir aser RSS lenir, K.N. Govindacharya-i temepishiba shidi ka ajanga Supreme Court dang Rohingya Muslim nunger refugees tem meyipa yoktsüla, kechiyong linük nung alitsü atema parnok nem temelaba agutsüba ajanga ano linük lemdangtsüsa akumtsüa akok, ta metetdaktsü.
Temepishiba shidi nungji pai, linük nütsüng kanga tali kümogo, aser iba ya ajanga linük nung aliba rongsentem tagimar, ta ashi.
Shidi ajangasa pai, “Delhi nung nüburtem jana nung südar aser Rohingya nungeri sorkar dang parnok nem nüngdakba tem agüjang ta akhanger, aser ibaji ajanga India nunger temetentem alema inyaker,” ta ashi.
Centre sorkar dang, Rohingya nunger Muslim refugee 40,000 Myanmar-i meyipa meyoktsü atema temepishiba ka agüja lir, aser iba ken oji September 11, 2017 nü Supreme Court-i angadangtsü.
Govindacharya-i ashiba agi, Rohingya nungeri mepishibaji agizükra, ano linük lemdangtsüsa akumtsüa akok.
“Al-Qaeda-i kiralongratsü aser Jihad atema Rohingya nunger amshiner ta meteta kümogo, aser Rohingya nungeri mepishibaji agizükra ano linük lemangtsüsa tensa arutsü. Union Home Ministry-i state ajak dang parnok (Rohingya) maitsü jangjatsü aser ozüng alema alirtem ajak meyipa yoktsü atema tetuyuba agüja lir, kechiyong parnok ajanga linük security amokmerener,” ta paisa shisem.