Rohingya nunger meyipa yoktsüla: Joshi

Bhopal October 14 (Agencies): India nung Rohingya refugees nütsüng kanga arenba onük nung Honibarnü RSS lenir, Bhaiyyaji Joshi-i, timtem madokdangyongi parnok Myanmar-i meyipa yoktsüla, ta ashi.
Tanü Bhopal nung osangbenertem den jembidang RSS leniri, “Parnok ya India nung jenoka alitsü atema aruba masü saka asalentong tamajung yur yangi jenoka alitsü meranger ama reprangteter. Parnok Jammu aser Hyderabad ama yimti nung jenoka lir. Parnok tera bushitsü nüngdak madoker, kechiyong parnok ajanga linük nem lendong agütsütsüa akok,” ta ashi.
“Parnok kari Aadhar number nguogo, kari PAN card nguogo aser karbo voters list nung densema lir. Onoki parnok yaseta mesüdaktsüner mesüra timtem majurudaktsüner, ajisüaka bendangertem mapang kobi ka jenoka lidaktsütsüla, iba telatetbaji alitsüla. Timtem madokdangyongi parnok meyipa yoktsüla,” ta paisa ashi.
Pai ashiba agi, Rohingya nungeri timtem agütsüba ajanga Myanmar-i parnok aridok.
Rohingya refugees onük nung Centre sorkar tangatetba pusema pai, “Shingaia parnok mejenokdaktsür, aser kidanger linük China aser Indonesia-ia parnok mejenokdaktsür,” ta ashi.
Tamangba yimsü kari temulung meyipdaktsüba dak sendakba nung tasüngdangba ka langzüdang Joshi-i, “Tsübudaktsüba aser mesüzükba ajanga tamangba yimsü melendaktsür, iba ya anentsüla aser sorkari anti-conversion ozüngtem shidak benoka inyaktsüla,” ta ashi.
Ayodhya nung Ram tekülem ki yanglutsü onük dak sendakba nung tasüngdangba ka langzüdang pai, “Tetsükdaktsü kar agienba sülen ang tekülem ki yanglutettsü. Sorkari item tetsükdaktsü agientsüla, aser parnoki iba atemaji inyakdar. Kodang item tetsükdaktsü agiendir Ram tekülem ki yanglutsü,” ta ashi.