Rohingya nunger nisung tenet Myanmar ket nung agutsüogo

New Delhi, Mongputeni/October 04 (Agencies): Tanü Manipur kübok Moreh nung India ketdangsertemi Rohingya Muslim nunger tenet Myanmar ketdangsertem ket nung agutsüogo.
Supreme Court-i temepishiba ka magizükba nung ajemdaker parnok meyipa yoker.
Nisung tenetji ozüng alema aitba ajanga 2012 küm Assam nung apuba sülen Silchar district nung aliba tepoukdak ka nung küm trok tashi puoka liasü.
Yashi Assistant Commandant Sudashu Kumar-i parnok tenet ji Assam nungi Moreh-i anir oa liasü. Inyakyim ajak tembangba sülen nisung tenetji Myanmar nung Deputy Director of Immigration, Aung Myo ket nung agutsü.
Union Home Minister, Rajnath Singh-i tetuyuba ka agutsüba nung ajemdaker International arrtsü nung aliba northeast state temi Rohingya Muslim nunger India telungi maitdaktsütsü atema mitter.
Police osang ka ajanga ashiba agi, Moreh aser Assam den arrtsüa aliba Jiribam district na nung Rohingya nunger aika puogo.
Rohingya nunger tenetji meyipa meyoktsü atema temepishiba ka benoka liasü, ajisüaka tanep Supreme Court-i temepishibaji magizük.
Chief Justice Ranjan Gogoi, Justice Sanjay Krishan Kaul aser Justice K.M. Joseph nungeri akumba bench-i temepishibaji magizük.
Rohingya nunger ya Myanmar kübok Rakhine state nungi minority Muslim nungertem lir, aser parnoki timtem marem India aser Bangladesh na nung jenoker.