Rohingya nunger tepsettsü sentong meyanglu: Myanmar Army Chief

Tokyo, Tsüklai/Feb. 16 (Agencies): Rohingya Muslim kin tajemzük jenjang nung alir ajunga samatsütsü merangba asoshi Myanmar army tekolakba merenshitsüla, linük aikati takhangba agüja aliba pai iba ama sentong meyanglu aser iba ama tai tongloktsüba ya linük indang konang mezüngmeshiba ka lir, ta ashi.
2017 küm Myanmar mitkartemi Rohingya nungertem reshikangshi tenzüker tang mezüngbuba tejangja nung Senior General Min Aung Hlaing-i sensaksemba mapang Rohingya nunger 730,000 Bangladesh-i jena ogo ta UN-i asadangteta aliba nung telangzüba agüja liasü.
“Kuli tejangja medeni aitsüba ajanga linük ka indang akhum raksatsür,” ta Min Aung Hlaing-i Japan nunger osangkaket Asahi Shimbun den sensaksemba Hokulbarnü adoktsü.
Bangladesh arrtsü anasa Rohingya telungpurtemi sepaitem dak amakba anema Myanmar sepaitemi 2017 nungi Rakhine State nung rara tenzük.
Nisung ajunga tepsettsü merangba aser tashiyim agi taküm raksatsüba ya kin ka samatsütsü tebilemba nung Min Aung Hlaing aser sepai tanishir pongui international law kübok mapa tamajungtiba inyakba lir, ta UN fact-finding mission ajanga taoba küm bushitet.
UN refugee chief Filippo Grandi-i Geneva nungi osangbener dang ashiba agi, pai iba sensaksem ya memetet saka taoba küm Myanmar sorkari par linük nung azüdokshi liasü aser nüburtem arrtsü alema jena ao aser parnok meyipa arutsü temeden lir ta United Nations den agreement ka nung sign sütepa liasü.
Taoba ita UN rights investigator temi ashiba agi, Rohingya nunger kin ajunga samatsütsü merangba atema Min Aung Hlaing aser tangartem merenshitsüla aser iba mapaji refugee tem meyipa marudang inyaktsüla.
Nisung tepsetba, tashiyim agi shi nung medemba aser iba amala mapa tamajung meinyak, ta Myanmar-i maneni nokdaka arur, saka Min Aung Hlaing-ibo sepi karbo dena alitsü akok, ta shia liasü.
Myanmar yimtiba, Naypyitaw nung Brehostibarnü osangbener den jembiba mapang nütsüng kwi jena oa lir ta asüba tasüngdangba kisüng masü saka kechi tebilemba nung parnok ajen, ta asüngdang.
“Parnok Bangladesh-i aoba ya kinungertem den külemi alitsü atema mesüra tanga linüki jena onüba tebilemba nung ao südi ta bilemtsü akok,” ta pai ashi.
“Parnok ajaki kasa dang ashir aser aji kari ashiba alitsü südi ta ni amanger,” ta paisa ashi.
Rohingya nungertem ya Buddhist nunger timba aliba Myanmar linük nung putu aika timtema aru.
Parnok ya South Asia nungi aruba illegal immigrants ta züngshir aser kar dang Myanmar senso ngua lir.