Rohingya nunger ya linük security atema lendong: Mohan Bhagwat

New Delhi, September 30 (Agencies): Honibarnü RSS tongti, Mohan Bhagwat-i, India nung aliba Rohinya Muslim nunger refugee tem ya India linük security atema amokmeren lir, ta metetdaktsü.
Paisa, West Bengal aser Kerala state nati jihadi kiralongrartem pusemer, aser parnoki yangji rara adokdaktsür, ta aitsü.
Nashi kümzükba dak sendakba nung RSS tongti, Mohan-i, iba nükjidong ataloktsü atema ozüngtem meraksatsüla; nashi kümzüktsü atema Bajrang Dal züngsemtemi dang masü saka Muslim nungera aikati taküm tenla agütsüogo, ta ashi.
RSS tentetba anogomong sentong nung jembidang pai, “Jihadi züngsemtemi Kerala aser West Bengal na nung rara adokdaktsür, aser nüburtemi ibaji anema nokdakdang state ana sorkartemi pei teinyaktsü meinyaki linük anema inyakertem ang pusemer,” ta metetdaktsü.
India nung aliba Rohingya nunger dak sendakba nung pai, linük lendongi maitsü atema akokba tashi ajak inyaktsüla, ta ashi. Meimchir temeim mapa nung ajemdaker Rohingya refugees nunger India nung alitsü atema temelaba agütsüba pusemertem aitsüba olen ka nung Bhagwat-i, “Meimchir temeim tenüng nung ajemdaker asenok meimchir amokmerenba tiaji asenoki mamadoktsüla,” ta ashi.
India nung Rohingya nunger ya lenla ka nung dang khuret masü saka aisü nung khuret akumtsü, ta paisa ashi.
“Bangladesh nunger ozüng alema linük telungi aitba tebilemtsü asenoki ano makok, aser maneni tang asenok madak Myanmar khuret lir. Asenoki parnok (Rohingya) yangi lidaktsüra, mapa manguba tebilemtsü dang masü saka asen linük security atemaa khuret akumtsü,” ta paisa shisem.
Nashi kümzükba dak sendakba nung pai, “Nashi metsühbaji tamangba yimsü den sendaktepa mali. Muslim nungera aikati nashi metsüher aser aser kümzüker. Nashi kümzüktsü aser aluyimba nung nashi amshitsüji linük temzüng nung tuyua lir,” ta ashi.
Nashi kümzükertemi nisung tepsetba dak sendakba nung RSS leniri, “Nashi kümzükertemi nisung kar tepsetbaji aitsütsü tetemsü. Atangji, ozüng alema benshiba mapatem ajak aitsütsü tetemsü,” ta ashi.