Rohingya onük nung sorkar tangatetba nungi matsünger: Jaitley

New Delhi, September 20 (Agencies): Rohingya refugees onük nung sorkar tangatetbaji mapatong ka lir, ta shia Bodhbarnü Union Finance Minister, Arun Jaitley-i, iba onük nung sorkari tangatetba nungi matsüngshitsü, ta metetdaktsü.
Myanmar nungi Rohingyas refugees dak sendakba nung sorkari, parnok ya Myanmar nungi ozüng alema arurtem lir, ta shiogo, aser iba dak sendakba nung tasüngdangba ka langzüdang Jaitley-i, “Onoki iba indangji affidavit ajanga jangjajangja metetdaktsüogo. Affidavit nung kechisa shia lir, ibaji sorkar tangatetba lir,” ta metetdaktsü.
“Security dak sendakbaji kechi, iba onük nung sorkar mapatongji kechi, meimchir meimba dak sendakba nung asenok tangatetbaji kechi? onoki Bangladesh-a yaridar aser meimchir temeim sayua onoki jang aser tanga nüngdakba osettsüset balala teyari yokogo,” ta Union minister-isa ashi.
“Iba ya ajanga linük security koma kongshitsü, aser iba ya ajanga nütsüng yongzük nung koma kongshitsü. Item ajakji asadanga iba telemtetba agi,” ta paisa ashi.
“Iba ya mapa küma inyaktsü indang onük ka lir, aser onoki affidavit ajanga onok tangatetbaji Supreme Court nem metetdaktsüogo,” ta paisa shisem.
Hombarnü Centre sorkari Supreme Court dang, Rohingya onük nung court tiyongtsüi aita meinyaktsüla, kechiyong Rohingya nunger par linüki meyipa yoktsüla, kechiaser iba ya linük security atema lendong lir aser parnok karbo Pakistan nunger itangitba telok, ISI aser tanga kiralongrar telok den dena lir, ta metetdakja liasü.
Intelligence osang nung ajemdaker Centre-i SC dang, Rohingya nung telungpurtem Delhi, Hyderabad, Mewar aser Jammu nung yakaka lir, ta metetdaktsü.
Centre-i ashiba agi, Rohingya nungerji linük atema amokmeren lir ta kuli sayua parnoki intelligence osang ajungaji envelope ka nung inoker October 3, 2017 anogo matongdang SC nem nem agütsütsü.
Ozüng alema Rohingya nunger India telungi aitdaktsütsü atema Myanmar, West Bengal aser Tripura nung network lir; Rohingya nunger aika ozüng alema voter identity cards aser PAN cards nguogo.
Supreme Court-i Rohingya Muslim nunger dak sendakba ken o ya maneni October 3, 2017 nü angadangtsü.