Rohingyas nunger nokdangtsü atema NE India kümdangshir

Aizwal/Guwahati, October 6 (Agencies): State-i refugee tem aitba nokdangtsü mechi nung Assam police-i state ajunga nung, talisa Bangladesh arrtsülen kümdangshia alitsü asoshi Bodhbarnü metetdaktsüogo. Mongolbarnü Tripura, Sonapura tesem nung Rohingya refugees tem state-i ozüng alema aitba nung teyari agütsüba atema India nunger asem apuba sülen iba jenjang ya agi.
Kasa mapang nung Mizoram sorkaria central security forces dang Myanmar aser Bangladesh den arrtsülen ozüng alema bendangertem aruba, talisa Rohingyas nunger nokdangtsü asoshi tali meita alitsü atema metetdaktsüogo, ta Minister kati Mongolbarnü ashi. Mizoram ya Myanmar den arrtsü km 510 aser Bangladesh den 318 lir koba Assam Rifles aser Border Security Force-i nüka lir.
“Centre sorkari tetuyuba agütsüba sülen state sorkari force anaprongla dang Myanmar aser Bangladeshi arrtsü nung security tali akangshitsü asoshi metetdaktsüogo, aser iba den sendaktepa sepai talila item tesemtemi yokogo,” ta Mizoram Home Minister R. Lalzirliana-i ashi.
hopta ishika tejakdang police temi Assam-Tripura interstate arrtsülen Karimganj, Churaibari tesem nung Rohingyas nunger asütsü, ta temolung melemi bilemba nisung parnok trok puogo, ta Assam Police DG Mukesh Sahay-i ashi. Parnok ya Bangladesh nung refugee camp ka nungi ajen aser Assam-i India nunger kar teyari ajanga ait. India nunger tem yagi Sipahijala district nung Sonamura tesem len arrtsü atsü atsüa maliba len nungi ozüng alema bendangertem India-i aitsüba atema teyari agütsür.
“refugee tem ya 2016 küm Myanmar nungi ajen aser parnok Bangladesh nung Cox’s Bazar district kübok Kutupalang yimtsüng nung aliba refugee camp nung lia liasü. Parnok ya Karimganj nung aliba nisung kar teyari ajanga Assami ait. Parnoki ashiba agi, parnok Bangladesh nung talitsü majungba ajanga mapa inyaktsüba atema Guwahati ajanga Napal-i onüa liasü,” ta Karimganj SP, Gaurav Upadhyay-i ashi. Paisa ashiba agi, parnok ket nungi Bangladesh nunger sim card aser sen puogo.
“Parnoki agütsüba osang dak ajemdaker police team ka Karimganj nungi Sonamura-i parnok nem teyari agütsürtem aputsü asoshi ao, saka parnok jena oadok. Ajisüaka parnok puja mapang temai adok aser mapang balala nung puogo,” ta SP-isa ashi. Bendangertem nem teyari agütsürtem ya Sahajahan Choudhary, Faruk Mia Choudhury aser Suman Choudhary ta jangjaogo.
Item refugee tem ya tawa Myanmar Army aser Arakan Liberation Army na tsüngda mangatettep adokba ajanga Arakan toktsür ajen.