Rohit Sharma-i ODI double hundred tasembuba azük

Mohali, December 13 (Agencies): Mohali nung tanü India aser Sri Lanka na tsüngda tanabuba ODi asaya India nungeri run 141 agi koka tang tashi nung telok ana yagi asaya ka ka koka lir. Iba asaya nung Rohit Sharma-i double hundred tasembuba züktetogo.
India nunger khen atema captain shimba Sharma-i ball 115 nung century yangu aser iba sülen ball 36 nung dang pai tanabuba century ya zükteta out mesüi pai run 208 yanglutet.
ODi asaya nung tang tashi nung double century ya tenetben dang yangluteta lir, aser item rongnung Rohit-i asemben tashi yanglua lir, aser iba nung küm asem tejak dang kasa telok den asaya dang pai run 264 züka world-record dena yangluogo.
Rohit-i asaya peyong nung four 13 aser six 12 ta azük aser asaya tetembangbuba over nung double century ya yanglutet. Dharamsala nung mezüngbuba asaya nungbo India nunger 112 dang yanglur ajak out süma, saka tanü asaya nungbo parnoki run 392 yangluteta asaya ayong ayonga kokogo.
Asaya nung Shikhar Dhawan-i run 68 azük aser Shreyas Iyer, shiba dang agi tanabuba ODI nung shilem agirba lir, pai ball 70 nung run 88 yanglutet.
Sri Lanka nunger bowler tem rongnungi Nuwan Pradeep over 10 aonba nung run 106 zükdaktsü aser iba ya ODi nung bowling figure tamajungtiba rongnung tasembuba lir.
Maneni asaya nung Sri Lanka nunger mapang tatsüka tsüngda dang lili out süli ta asü, aser parnok India den tokteptsüba atema jenjang nung meliasü, saka parnok rongnungi Angelo Mathews-i out mesüi run 111 yanglutetba ajanga parnok mak asütsü nungi kümzüka over 50 nung run 251 yanglutet.
Team ana tsüngda tatembangbuba asaya Deobarnü Visakhapatnam nung asayatsü.