Rohit Sharma-i T20I nung ‘Fastest Century’ yanglutet, David Miller den sako kümogo

Indore, December 22 (Agencies): India nunger tebur cricket asayar rongnungi Rohit Sharma-i run agiba manenteter. Hokulbarnü Sri Lanka den T20I asayaba nung pa asoshi T20I nung tanabuba century yanglutetogo. Tanü asaya nung Rohit Sharma-i century yanglutetba ajanga T20I cricket asaya otsü nung run 100 tekeratiba nung yanglutetba otsü South Africa nunger David Miller-i yanglua aliba den sako kümogo. Sharma aser Miller nati ball 35 nung run 100 ya yanglutet. ODI nung run 200 asembenbuba yangluteter hopta ka dang lir pai limited-overs format nung kanga junga asaya arudagi. Rohit Sharma-i iba otsü yangluba mapang four 11 aser six 8 agitet.
Saka Rohit ya run 118 ngur lia out sütsü. Pai runs 118 yangluba mapang four 12 aser six 10 nguteta batting strike-rate ya 274.42 liasü. Rohit ya Sri Lanka nunger Dushmantha Chameera bowling nung out sütsütet.
Hokulbarnü Indore nung Sri Lanka aser India tsüngda T20I tanabuba asaya nung Sri Lanka nunger bowler tenet tashi melentepa aon, saka Rohit Sharma-i kanga junga asayateta pa asoshi iba otsü tasen ya yanglu.
India nunger Lokesh Rahul-ia ball 35 nung pa asoshi T20I half-century asembuba yanglutet. Rohit aser Rahul tsüngda 165 run partnership ya T20I nung India nunger atema nisung ana külemi yangluba timtiba lir. Saka Rahul ya ball 49 nungi run 89 nguteter lia Lanka nunger Niroshan Dickwella-i out sütsü.
India nungeri over 20 nung nisung pongu out sür runs 260 yangluteter innings tembang, aser iba ya India nunger asoshi T20I nung run timtiba alitsü.
T20 International nung India nunger rongnungi run 1,500 yangluteter ya Virat Kohli dang liasü, saka taoba Bodhbarnü Barabati Stadium, Cuttack nung Sri Lanka den asayaba mapang Rohit Sharma-ia T20I nung run 1,500 alizüng tongteta liasü.
T20I nung hundred tekeratiba nung yanglutetertem:
35 balls – Rohit Sharma & David Miller
45 balls – Richard Levi
46 balls – Faf du Plessis & KL Rahul
47 Balls – Aaron Finch & Chris Gayle