Rohit Vemula’er kibong atema ochi temeten aginer: ABVP

Chennai, January 29 (Agencies): Hyderabad Central University nung Rohit Vemula soseta asüba ken o nung Hokolbarnü Hindu right wing tentet, Akhil Bharatiya Vidyarthi Parishad (ABVP)-i, parnoki taitsüba anema nokaktsü atema linük tesem ajaklen campaign ka tenzükogo, ta ashi.
ABVP lenir Susheel Kumar dak azük ta tai tonglokja Dalit nunger kaketshir pongu University nung anentsüba sülen January 17 nü University campus nung research student Vemula soseta asü.
Hokolbarnü Chennai nung osangbenertem den jembidang ABVP national general secretary, Vinay Bidre-i, “Iba ya dalit nunger aser dalit nunger masübatem indang onük ka masü. Iba ya Yakub Memon (Pakistan nunger kiralongrar) pusemertem aser linük meimer kaketshirtem na tsüngda rara ka lir, saka iba onük nung nisungtemi ABVP tenüng menüktsür,” ta ashi.
Rohit soseta asüba nung ABVP-i shilem kecha agia mali ta shia Bidre-i, “Nationalist student’s organization (ABVP)-i iba tatalokba ken o nung parnok anema bushisüngdangtsü melunga lir,” ta ashi.
“Onoki ochi bushisüngdang aginer. Onok mezüng takhangbaji, Rohit Vemula’er kibong atema ochi temeten aginer,” ta paisa ashi.
HCU nungi kakethshir 25-i linük nung campaign ka tenzüka o toktepba den campus nung ataloka arubatem osang sangdonger.
Bedra-isa, Tamil Nadu state sorkari Villupuram nung aliba SVS College of Naturopathy &, Yoga Science anema temerenshi magütsütet ta aija, “Onoki health minister aser education minister na anentsütsü akhanger. Kaketshirtem ochi temeten mangu tashi ABVP-i maneni lungkak aittsü,” ta ashi.