New Delhi, January 21 (Agencies): Hyderabad University nung Dalit nunger shisashir Rohith Vemula soseta asüba ken o ajanga Centre sorkari Dalit nunger anemba temaitsü sayur, ta tanü Congress-i aitsüogo.
“HRD Minister (Smriti Irani) aser BJP-i Vemula asübaji tim dang ta shiogo. Ibaji ajanga Dalit anema inyakba sayur,” ta Congress otongdar Randeep Surjewala-i New Delhi nung osangbenertem dang ashi.
Paisa, Vermula soseta asütsüsa inyakertem atema tatok meshitsütsü aser melenshitsü melena Bharatiya Janata Party aser HRD minister nati parnok ang pusema jembiogo, ta ashi.
Bodhbarnü Union minister Irani-i osangbenertem senden ayongzüka jembiba dak sentakba nung Congress leniri, “Congress-i Smriti Irani menden nungi anentsütsü akhanger” ta ashi.
Bodhbarnü Irani-i, Vemula soseta asüba onükji “Dalit nunger aser Dalit nunger masübatem” na tsüngda raraba onük ka masü, ta shia liasü.
Ano Hyderabad nungi tanga osang ka nung, Brihostibarnü Hyderabad University executive council-i Rohith densema University nungi anenja aliba Dalit nunger PhD kaketshir pezü tanaben agizükogo.
Dalit kaketshir- Prasanth, Pepapudi Vijay Kumar, Sheshaiah Chemudugunta aser Velpula Sunkanna nunger class nung adentsü melungaka parnokji hostel, library, mess aser kaketshirtem adenshitak tesemi aotsü memelai liasü.
ABVP kaketshir Susheel Kumar-i, Ambedkar Students’ Association (ASA) züngsemtemi (Dalit) pa dak azük ta ken o benokba sülen Dalit kaketshir ponguji University nungi anenja liasü.
You must be logged in to post a comment Login