Rohith soseta asüba shidi nung minister tenüng tetshia mali: Smriti

IraniNew Delhi, January 20 (Agencies): Deobarnü Hydrabad University nung arishi küm 26 Dalit nunger shisashir Rohith soseta asüba ken o nung opposition party temi sorkar aitsüba dak sentakba nung Bodhbarnü osangbenertem senden ka ayongzüka jembidang Human Resource Development Union Minister, Smriti Irani-i, Rohit Vermula soseta asübaji kinkidong onük ka masü, ta ashi.
“Tetsü ka aser minister ka ama, Rohith Vermula soseta asüba ajanga ni kanga jashir. Iba ken o police-i bushisüngdang tenzükogo. Taoba mapang nunga Hyderabad University indang ken o aika HRD Ministry dangi aruogo,” ta Irani-i ashi.
Iba ken o nung Labour Minister Bandaru Dattatreya pusema Irani-i, “Iba onük atema tebilemtsü kaa jembiba MP ji Dattatreya kija masü. Congress lenir Hanumant Rai-ia Hyderabad University nung Dalit nunger soseta asüba atalokba timba akümba atema bushisüngdangtsü asoshi aiben shidi züluogo. Iba den külemi Rohith-i pa soseta asüba shidi nungji tentet mesüra minister shinga tenüng zülua mali. Rohit Vermula soseta asübaji kin kidong nung ajemdaker soseta asüba masü ta ni ajak dang sangdongtsü meranger,” ta ashi.
“Osang channel kar aser opposition party temi Rohith Vermula soseta asübaji kin kidong dak sentaka lir ta jenbir, ajisüaka ibaji tai. University-i temerenshi agütsübaji tim dang aser committee-ia agizüka liasü,” ta laisa ashi.
Rohith Vermula ya kümnabuba PhD kaketshir ka liasü aser kaketshir yimtenren nung kanga ajemoka liasü. Yaküm August ita Akhil Bharatiya Vidyarthi Parishad (ABVP) lenir ka den rara adokba ajanga Dalit nunger kaketshir pongu University nungi meintok, aser par pongu rongnung Rohith densema liasü. Iba mapang nungjagi tenzüka Rohith densema Dalit kaketshirtemji University moapu nungsa mejanga liasü, aser iba tejashi nung January 17, 2016 nü pa soseta asü.

You must be logged in to post a comment Login