Rohith Vemula ji Dalit nunger masü liasü : Guntur collector

Guntur, February 14 (Agencies) : January 2016 nung University of Hyderabad nung azünger Rohith Vemula soseta asüba atema linük ajungalen mepetmesü adoka liasü.
Ajisüaka, tang media osang ka ajanga ashiba agi asür Rohith ya Dalit nunger masü.
Andhra Pradesh kübok Guntur nung District Level Scrutiny Committee-i Rohith Dalit nunger ta asüba ken o bushisüngdanger aser parnoki bushitetba osang nung, Rohith Vemula aser pa tetsü Radhika naji Dalit nunger masü ta shia lir.
Par kibongi tim masüba inyakyim ajanga Scheduled Caste certificate anguba meyipa agitsüla, ta District Level Scrutiny Committee-isa ashi.
Iba nung ajemdaker Andhra Pradesh sorkari Rohith Vemula ji Dalit nung masü ta ashitsü akok aser par kibong nem agüja aliba Scheduled Caste certificate agientsü akok.
State sorkari Radhika dang la kechiba Vaddera nunger masü ta asüba atema telangzüba agütsütsü tetuyuba ka agütsüogo. Vaddera ya OBC category kübok lir.
Lai la Dalit nunger ka ta ashir süra, iba atema nüngdakba kulikakettem lai hopta ana tsüngda agüjang, ta sorkarisa tuyuogo.
Vice Chancellor Appa Rao Podile-i anir University ketdangsertem den BJP-i aniba Centre sorkartemi Dalit nunger anema inyak aser iba ajanga Rohith-i soseta asü, ta tai toglokja lir.
Cyberabad police-i Vice Chancellor, Union Labour Minister Bandaru Dattatreya, aser tangartem SC/ST Act kübok tai tonglokja lir.
Cyberabad police-i bushisüngdang tembangtsü atema Guntur Collector nungi Rohith indang kin jenjang osang dang ataa liasü.