Romania nightclub mi lendong nung 27 asü, 180 shi yiru

Romania kübok Bucharest yimti nung tentetba Colectiv nightclub nung yasüng, Hokolbar aonung atalokba mi aser pokshiba lendong nung yirur ka mozüki bushia anir aotsü asoshi rescue ketdangsertemi ambulance gari nung ajungokba noksa ka yangi angur. (Bucharest, October 31)

Bucharest, October 31 (Agencies): Romania kübok Bucharest yimti tiyongtsülen tentetba Colectiv nightclub nung mi aser pokshiba lendong ka yasüng, Hokolbar aonung atalokba osang ka Romania Interior Ministry ketdangser kati tanü Honibar nü metetdaktsüogo.
‘Goodbye to Gravity’ ta ajaba kentener teloki par kensep tasen ka adokba nüngtem nung angati agi ayongba kenten sentong iba nightclub telung nung ayonga agidang mi lendongji atalokba osang jangjaogo ta ketdangsersangi ashi.
Mi jangrua mokozü kanga sashia adoktsü tenzükba ngua kenten sentong nung shilem agir nisung 400 shi kimaleni jena alutsü meranga nungtepdang nisung aika ajemsetba den külemi, nisung aika yirua liasü.
“Yasüng mi aser pokshiba lendong atalokba den külemi, nisungtem nungtepba ajanga nisung 27 asüba aser nisung 180 shi yiruba osang tang tashi nung jangjaogo,” ta Interior Ministry otongdar, Monica Dajbog-i osang jangjashitsü.
“Tan yirurtemji mozüki 12 tashi nung tang anepalua lir aser parnok kar taküm jenjang tang kanga mejungi lir,” ta lai shisem.
Tan mi lendongji kechi timtem ajanga adok iba osangji tanü tashi mejangjateti lir aser kasaji jangjatsü asoshi ketdangsertemi bushisüngdang tenzükogo.
“Tan lendong atalokba osang angashia ni kanga dang aoksar. Tan lendong atalokba ya asen linük ajunga atema mangyim jashi mapang ka lir,” ta shia, Romania Tir, Klaus Iohannis-ia tan lendong atalokba atema sasaba bilemba olen ka tanü lemsatepogo.
Taoba mapang, 2013 küm Brazil kübok Santa Maria yimti nung tentetba nightclub nung mi lendong adoka nisung 235 tashi asüba sülenbo tan Bucharest yimti nung atalokba lendong ya nightclub nung atalokba mi lendong rong nung tesashitiba lir.