Rome Open: Djokovic-i Nadal den quarterfinal asayatsü

Rome, May 13 (Agencies): Defending champion, Novak Djokovic-i Brazil nunger Tomaz Bellucci koka tang tasayadak Rome Open tennis asayamong quaterfinal asayatsü jenjang yashi, Brehostibar nü ajangzükogo.
Serbia nunger Djokovic-i yashi points 0-6, 6-3, 6-2 ngua Bellucci madak 3 buba round asaya akok.
Tebur World No. 1, Djokovic-i Spain nunger tennis asayar mongin, Rafael Nadal den quarterfinal asayatsü lemzükogo.
Taoba mapang Rome Open takok marok 7 ben tashi agizüka alisang, Nadal-ia points 6-7 (3/7), 6-2, 6-4 ngua Australia nunger Nick Kyrgios 3 buba round nung tsükdakja quarterfinal asayatsü jenjang anguba osang jangjaogo.
Taoba asaya 6 tashi atonga akokba densema, Djokovic-i tanü tashi nung Nadal den 48 ben tashi ajurutepa asayadang, Nadal madak 25 ben tashi takok ngua lir.
Tan asayamong nung 6 buba jenjang abensang, Japan nunger Kei Nishikori-ia points 6-1, 6-4 agi France nunger Richard Gasquet 3 buba round nung nung tsükdaktsüba sülen Switzerland nunger Roger Federer madak takok angusang, Austria nunger Dominic Thiem den quarterfinal asayatsü lemzükogo.
Ano külen, tebur World No. 3, Britain nunger Andy Murray-i points 6-1 7-5 agi Belgium nunger David Goffin quartefinal asaya nung tsükdakja tebur singles semifinal asayatsü jenjang tanü, Hokolbar nü ajangzükogo.
Tan asayamong nung 2 buba jenjang nung alisang, Murray-i France nunger Lucas Pouille den semifinal asayatsü.