Rome Open: Thiem-i Federer madak takok ngua quarter-i iogo

Rome, May 12 (Agencies): Austria nunger Dominic Thiem-i Switzerland nunger Roger Federer madak takok ngua tang tasayadak Rome Masters tennis asayamong tebur singles quarterfinal asayatsü jenjang tanü, Brehostibar nü ajangzükogo.
Tan asayamong nung 13 buba jenjang abensang, Thiem-i tanü ghonda 1 ser minute 18 nung points 7-6 (7/2), 6-4 ngua tan asayamong nung 3 buba jenjang nung alisang, Federer 3 buba round asaya nung tsükdaktsü.
Taküm February ita temokok operation agiba ajanga Federer-i taküm küm tenzüker tanü tashi nung tennis asayamong 4 nung dang shilem agia lir.
Arishi küm 22 tain Thiem-i tanü takok anguba sülen France nunger Richard Gasquet mesüra Japan nung Kei Nishikori na rong nung ka den quarterfinal nung ajuruteptsü.
Tetsür singles asayar tarensen nung temaba jenjang abenla, America tsür Serena Williams-ia points 7-6 (7) 6-1 agi külem sensotsür, Christina McHale 3 buba round nung tsükdaktsüba sülen tetsür singles quarterfinal asayatsü jenjang ajangzükogo.
Tan asayamong nung 3 buba jenjang abener, Spain tsür, Garbine Muguruza-ia Latvia tsür, Jelena Ostapenko madak 3 buba round asaya koka quarterfinal-i aiba osang jangjaogo.