Ronaldinho football asaya nungi anener

Aenjeti 17, 2018 (Agencies): Taoba mapang Brazil aser Barcelona nungi midfield nung asaya alisang Ronaldinho football asaya nungi anener, ta pa adianu aser agent Assis-i sangdong ka ajanga metetdaktsü. Ronaldinho asayaa aruba mapang nung World Cup, Champions League, Copa Libertadores koktetogo aser World Player of the Year award dena nguogo.
Ronaldinho 2015 küm nungi tetoktepba balala nung masayai dang aru saka pa football asaya nungi anenbabo mesangdongi liasü.
“Pa asaya nungi anenogo. Russia nung World Cup tembangba sülen onoki Luroi (August) meta mapa ka inyaktsü,” ta Assis-i ashi.
Iba sentong ya farewell asaya ama asütsü aser asayatem Brazil, Europe aser Asia nung asayatsü aser iba nung national team dena match ka asayatsü akok, ta Assis-i ashi.
Ronaldinho Metsüremi nung arishi küm 38 ajungtsü. Pa Gremio nungi football asaya tenzük aser iba sülen Paris Saint-Germain, AC Milan, Queretaro aser Brazil club Flamengo, Atletico Mineiro aser Fluminense nunger nungi asayaogo.
Ajisüaka pa 2003 nungi 2008 tashi Barcelona nung asayaba ya pa asoshi mapang tajungtiba liasü.
Pai Barca pur 2006 küm Champions League, 2005 aser 2006 küm La Liga akokba nung teyari tulu agüja liasü. Iba dak alaka pai 2005 küm Ballon D’Or ngutetogo.
Ronaldinho 2008 küm Milani ao aser 2011 tashi idakji asayaa lir Brazil-i meyipa oa Atletico Mineiro nung asaya. Pa iba club nung asayaba mapang par teloki mezüngbuba Copa Libertadores title 2013 küm kokteta liasü.
Pa Brazil team nungi 101 ben asayaogo aser iba nung pai goal 35 idaktsü.