Ronaldo goal 500 agütsür akümer; Raul otsü menepogo

Malmo, October 01 (Agencies): Portugal nunger football asayar mongin, Cristiano Ronaldo-i yashi Bodbar nü Malmo telok madak goal 2-0 agi takok ngua asayaba asaya nung takokba goal anaprongla par Real Madrid telok tenüng nung agütsüba sülen goal 500 buba agütsür asayar küma otsü yangluogo.
Arishi küm 30 tain Ronaldo-i yashi goal 500 aser 501 buba agütsüba sülen Champions League asayamong nung goal timba, 82 tashi agütsür kümogo.
Ronaldo-i yashi goal takok ngua agütsüba ajanga taoba mapang nung Madrid telok asoshi goal timba, 323 agüja otsü yanglusang, Raul otsüa menepogo.
Champions League asayamong nunga goal 67 tashi agütsür küma, Ronaldo iba asayamong nunga goal timba agütsür asayar tan akümer lir.
Taoba mapang nung Manchester United telok tenüng nung goal 118, Sporting Lisbon telok asoshi goal 5 aser Portugal telok tenüng nung goal 55 agütsüsang, Ronaldo-i asaya 753 buba nung goal 500 buba agütsüba alizüng ya ajangzük.
“Alima ajunga nung football telok tulutiba asoshi goal timba agütsüba otsü yanglutettsüsa maongka anguba atema kanga pelar. Iba ama alizüng tulu ajangzüktettsüsa yaritepba atema külem asayartem nem tenüngsang agütsür,” ta Ronaldo-ia metetdaktsü.