Ronaldo-i 4 buba Golden Boot sempet agizüker küma otsü yanglur

Madrid, October 13 (Agencies): Real Madrid forward asayar, Cristiano Ronaldo-i 2015 Golden Boot sempet tanü Mongolbar nü agizüka iba nungtugu sempet 4 tashi agizüker asayar küma otsü yangluogo.
Portugal captain, Ronaldo-i tan La Liga asayamong nung ajak agi goal 48 tashi agüja Europe ajunga nung goal timba agütsür football asayar akümba nüngtem nung 2015 Golden Boot sempet ya pa nem agütsü.
Taoba mapang Ballon d’Or sempet agizüksang, Ronaldo-i 2014-15 tsüngda nung ajak agi goal 61 tashi agütsüba osang bushiteta lir.
Arishi küm 30 tain Ronaldo-i tawa goal 324 buba agütsüba sülen Spain nunger Raul Gonzalez-i goal 323 agüja yangluba otsü ajangteta par Madrid telok asayar rong nung goal timba agütsür asayar akümba osanga bushitetogo.
“Ni Golden Boot sempet ka mesüra ana agizüktsü akok ta bilema liasü. Ajisüaka, iba nungtugu sempet pezüben tashi agizüktsü maongka angutsü tabo kodanga mebilemi liasü. Aji oda, ni iba ama maongka tajung angutsüsa kü den yaritepba atema külem asayar aser ni yarirtem dang pelaba metetdaktsür,” ta Ronaldo-i sempet agizükdang sangoktsü.
Ronaldo-i Argentina nunger football asayar mongin, Lionel Messi den goal 5 agi timba agüja Europe nung ayongba tongti football asayamong nunga goal 82 tashi agüja goal timba agütsür asayar jenjang tang bena lir.