Ronaldo-i Best Portuguese Footballer 2017 sempet angu

Lisbon, Metsüremi 20 (Agencies): Real Madrid nungi football asayar mongin, Cristiano Ronaldo-i 2017 Quina de Oro Award for Best Portuguese Footballer of the Year sempet kümnabuba nguogo.
Portuguese Football Federation (FPF), National Association of Portuguese Coaches (ANTP) aser Union of Professional Football Players (SJPF) ajanga ayongzükba sentong ka Carlos Lopes Pavilion nung alidang Ronaldo-i iba sempet ya Tentonü agizük, ta osang ajanga ashi.
UEFA Tir, Aleksander Ceferin-i iba sempet ya Real Madrid nungi forward nung asayasang nem agütsü aser pai final vote nung Manchester City nungi asayar Bernardo Silva aser Sporting CP nungi asayar Rui Patricio na dang timba vote ngutet.
“Kija jenjang nung taoba küm ya kodanga mamatettsü küm ka liasü,” ta Russia nung World Cup asayatsü asoshi Portugal-i jenjang tongtetba aser Real Madrid-i trophy pongu tashi koktetba bilemtata Ronaldo-i ashi.
Ronaldo-i iba sempet ya küm ana atonga akoker aser pai-sa Quina de Oro Award for the Best Portuguese Player of All Time sempet 2015 küm agizüka lir.