Ronaldo-i Real Madrid tola ka Nepal nunger tebur chanu ka nem agütsür

Banepa, August 28 (Agencies): Portugal nunger football asayar mongin, Cristiano Ronaldo-i pa maitsü ajenokba Real Madrid tola ka taküm April ita Nepal nung atalokba menoknok lendong ajurushir tebur chanu ka nem agütsüba osang jangjaogo.
Nepal tiyongtsülen, Banepa jila nung alir arishi küm 13 tain, Jetin Shrestha-i pa nem yokba talep lapoka reprangdang, talep telung nung taoba Manchester United striker, Ronaldo maitsü ajenokba tolaji ngua kanga dang pela liasü.
Tola denji külemi, talep telung nung Ronaldo-i “Jetin, tali tasü itang. Na atema sarasademtsür, Ronaldo” ta shiti tatsüka zülua aliba angu.
Nepal nung menoknok kanga sashia anokdang football tajungba asayatsü temulungtetba alisang, Jetin-i oda football metsüshia aliba ngua, noksa agir, Omar Havana aser osangbener, Magarida Mota nati Jetin noksaji agi aser kasaji Ronaldo’er ketdangser, Jorge Mendes nem amokja Jetin indang otsüji pa den lemsatep.
“Künübo nia Real Madrid telok tenüng nung football asayatsü kechiyong ni football asayabaren kanga dang meimer,” ta Jetin-ia metetdaktsüogo.
Ronaldo-i taoba mapang nunga tsunami lendong ajurushir kati pai asemba No. 7 tola semer aliba video ka reprangshiba sülen Indonesia-i tsüngdong oa tsunami lendong ajururtem asoshi sen bendentsüba osang bushiteta lir.
Ronaldo-i football tsüngsem aser pa maitsü ajenokba tola tenla agütsüba den külemi, ita 10 kinü chanu ka tekolok operation agitsü asoshi pound sen 50,000 dak tema tenlaba osanga bushitetogo.